Aaja ataatsimiititaliami mianersortumik ingerlatsiniartoq
Issittup Inatsisartuini ilaasortaatitaannut Ataatsimiititaliap, Aaja Chemnitz Larsenip siulittaasuuffigisaata ataatsimiititaliami sulineq unitsikkallarneqassasoq aalajangersimavaa. Taamatullu aalajangernera Russit tungaannit ingerlaannartumik qisuariarfigineqarsimavoq.
Ukrainemi sorsuttoqarnera ullormiit ullormut, nalunaaquttap akunneraniit nalunaaquttap akunneranut allanngortuarpoq. Politikkerit diplomatillu sumiiffinnit assigiinngitsuniittut sakkortuumik oqaaseqartarput. Issittumi Siunnersuisoqatigiit suleqatigiinnerat unitsikkallarneqarsimavoq, maannalu Issittup Inatsisartuini ilaasortitaasut suleqatigiinneq aamma unitsikkallarsimavaat, Ukrainemi sorsuttoqarnera pissutigalugu.
- Akerariinneruleriartortoqarnera diplomatillu atorpallaarunnaarneqarnera isumakulunnarpoq, pingaartumik suliniaqatigiiffiit diplomatiskiusut eqqarsaatigalugit. Ataatsimiititaliami aalajangersimavarput, Issittumi Siunnersuisoqatigiit aalajangersimanerat malillugu, siunissami qaninnerusumi suliassatta unitsikkallarneqarnissaat, Issittup Inatsisartuini ilaasortaatitanut Ataatsimiititaliami siulittaasoq Aaja Chemnitz Larsen Sermitsiaq.AG-mut oqarpoq.
Isummat naapisikkuminaatsut
Ataatsimiititaliaq aalajangernerminut atatillugu oqaaseqaateqarsimavoq, russit inatsisartuinik aalassatsitsisimasumik.
- Ruslandip pissutissaqanngitsumik Ukrainemik saassussinera nunarsuarmi inuiaqatigiinnut ilungersunarluinnartumik kinguneqartitsisimavoq, tamanna naalagaaffiit allanut attaveqartarnerannik misissueqqissaarnissamik pisariaqartitsilersimalluni, nalunaarummi ilaatigut allassimavoq.
Nalunaarullu russit tungaannit sakkortuumik tiguneqarsimasoq, Aaja Chemnitz Larsen oqaluttuarpoq.
- Nalunaarut russinit sakkortuumik isornartorsiorneqarpoq. Issittumi diplomatip attatiinnarneqarnissaa sakkulersortoqannginnissaatalu qulakkeerneqarnissaa sapinngisatsinnik attanniarsarivarput, taamatulli inissisimasoqalernera ilungersunarluinnarpoq, kikkummi tamarmik soqutigisaat malillugit suliniarneq ajornarmat.
Ruslandip nalunaarummut akissutigisimasaa, sorsunneq pillugu nunarsuarmi tusagassiorfinnit takusartakkatsinnut akerliulluinnarpoq. Erseqqissumik paasinarsivoq Ruslandip nalunaarut isumaqatiginngilluinnaraa, nalunaarummimmi oqaasertaliunneqarsimavoq ”Ruslandip pissutissaqanngitsumik Ukraine saassussimagaa”.
- Siunnersuut tamanna sakkortunerpaamik akerlilerparput. Pivisumut tunngassuteqanngilluinnarpoq akuersaarneqarsinnaananilu, russit nunanut allanut ministeeriaqarfiat akissummini allappoq.
Ruslandip aaqqiagiinngissuteqarneq "immikkut ittumik iliuuseqarnertut" oqaatigisimagaa
Allakkami aamma atuarneqarsinnaavoq, Ukraine "naalagaaffiit pingajuattut" nazistinit aqunneqartumik atuutilersimasoq.
- Maannatut inissisimanitsinni Ukrainemi immikkut ittumik suliassaqarpugut, nunarsuarmiullu anguniagarisariaqarpaat: nunami naalliutsitsisarfiumi nazistit nungusarneqarlutillu sakkussiortoqannginnissaa. Issittup inatsisartuisa sapinngisaminnik Issittumi aaqqiagiinngittoqannginnissaa sakkussiortoqannginnissaalu anguniassagaat neriuutigaarput, russit nalunaaruteqarput.
Issittup Inatsisartuini ilaasortaatitanut Ataatsimiititaliata sulinerup unitsikkallarneqarnissaanik aalajangersimanini attatiinnarpaa.
- Pisut malinnaaffigilluarpavut, sumiiffinnimi allani pisut soorunami Kalaallit Nunaannut Issittumullu sunniuteqarsinnaapput.
Nunai baltiskiusuni inatsisartut ataatsimiititaliaata aamma nalunaarutigisimavaa, Ruslandimik suleqateqarnertik atorunnaarsissimallugu. Taamatut nalunaaruteqarneq kinguneqapallatsinneqarsimavoq, Ruslandimmi Nunani Avannarlerni Ministerit Siunnersuisoqatigiivisa aamma Nunani Avannarlerni Siunnersuisoqatigiit Rsulandimi suliaqarnissaat inerteqqutigilersimammagu.