pisortatigoortumik
Aaja Aleqalu Folketingimut ilaasortanngortut
Qinersivinnit kingullernit inernerit nal. 00:30 pisortatigoortumik akuerineqarput
Aleqa Hammond inuttut 3.745-nit taaguunneqarluni Siumut sinnerlugu Folketingimut ilaasortanngorpoq, Aaja Chemnitz Larsenilu 2.540-nit taaneqarluni IA sinnerlugu Folketingimut ilaasortanngorluni.
Siumup siulittaasorisimasaa akerleriissutaasoq taamaalilluni politikkikkut nutaamik suliaqalerpoq.
IA annerpaanngortoq
Inuit Ataqatigiit 7.904-nit, 38,5 procentit taamaaqatigisaannit, taaneqarluni partiini annerpaanngorpoq. Partii tamatuma akerlianik 2011-mi qinersinermut sanilliullugu kinguariatsiarpoq, taamani 40,7 procentinit taaneqarami.
Siumut siuariartoq
Siumut 7.831-nit taaneqarluni tullersortaavoq, partiilli siuariatsiarnini nuannaarutigisinnaallugu, ukiut sisamat matuma siorna qinersinermi 35,6 procentinit taaneqarami.
Demokraatit kinguariartut
Demokraatit Folketingimut qinersinermi qinersisartunit pillarneqarput. Partii katillugit 1.753-init taaneqarpoq, tamannalu 38,1 procentinik kinguariarneruvoq.
Partiit talerperliusut aappaat, Atassut, aamma kinguariarpoq - 2011-mi qinersinermut sanilliullugu 10,6 procentinik, qinersinermi matumani 1.526-nit taaneqarluni.
Partii Naleraq 4,7 procentinit taaneqartoq
Partii Naleraq politikkimi nutaajusoq taasinerit 4,7 procentiinik pissarsivoq.
Assit marluk ataani aamma qinersinerup inernera takukkit