tusarniaaneq
Aaja, Aleqaanngitsoq tusarniaanissamik siunnersuuteqartuuvoq
Aleqa Hammond oqarpoq Danmarkimi kalaallit atugarisaat pillugit Folketingimi tusarniaasoqarnissaanik suliniuteqartuusimalluni. Folketingili naapertorlugu Aaja Chemnitz Larsen tamatuminnga suliniuteqartuuvoq
– Danmarkimi kalaallit qanoq isilluni pitsaanerusumik tikilluaqquneqarlutillu akulerutsinneqartarnissaannik tusarniaanissaq Kalaallit Nunaannut Ataatsimiititaliami suliniutigisimavara.
Taaamatut Siumup Folketingimut ilaasortaatitaa Aleqa Hammond, qanittukkut tusagassiorfinnut nalunaarutikkut allappoq.
Aleqaanngilaq
Folketingilli Kalaallit Nunaannut Ataatsimiititaliaata allagaatai naapertorlugit Aleqa Hammond tamatuminnga suliniuteqartuunngilaq, suliniuteqarsimasorli tassaavoq Inuit Ataqatigiinneersoq Aaja Chemnitz Larsen.
Tusarniaanissaq Kalaallit Nunaannut Ataatsimiititaliap novembarip 20-anni ataatsimiinnerani oqaluuserineqarpoq, tassani Aaja Chemnitz Larsenip siunnersuutaa ullormut oqaluuserisassat pingajuattut allassimalluni.
Uppernanngitsoq
Aleqa Hammondip pissusilersornera Aaja Chemnitz Larsenip kakkaginngilaa.
– Isumaqarpunga uppernassuseqarneq annikillisarneqassasoq Folketingimi sulineq pillugu eqqunngitsumik oqalukkaanni. Folketingnip nitdtartagaani sukkasuumik ujaasinikkut takuneqarsinnaavoq ilumuunngitsoq kalaallit Danmarkimi najugallit tusarniaavigineqarnissaat Aleqa Hammondip suliniutigisimagaa. Tusarniaanissap ingerlanneqarnissaa anguniarlugu sulissuteqangaatsiarsimavunga, tamannalumi aamma Kalaallit Nunaannut Ataatsimiititaliap tamarmi taperserpaa, aamma Aleqa Hammondip. Ilumuunngilarli taanna tusarniaanissamik suliniuteqarsimasoq, Aaja Chemnitz Larsen erseqqissaavoq.
Sermitsiap Aleqa Hammond oqaaseqartinniarsaraa.