Aaja aamma Aki: Angerlarsimaffiup avataanut inissiisimanerit nalilersoqqinneqartariaqarput

Nunatta folketingimut ilaasortaatitaat marluk isumaqarput meeqqat angerlarsimaffiup avataanut inissinneqarsimasunut tunngatillugu suliat nalilersoqqinneqartariaqartut. Angalaqatigiillutik nunatsinniit nalilersuiartortitanik pilersitsisoqartariaqarpoq.

Danmarkimi meeqqat kalaallinik angajoqqaaqartut 6 procentii angerlarsimaffiup avataanut inissinneqarsimasarput. Angerlarsimaffiulli avataanut inissinneqarsimanermut aalajangiisarneq VIVE-p nalunaarusiaani maanna apeqquserneqarpoq, soorlu aamma immikkut ilisimasallit arlallit siuliatigut apeqqusiisimasut.

Apeqqusiinermut tunngavilersuutigineqarpoq angajoqqaat piginnaasaannik nalilersuinermi misissuutit danskinut tulluarsarneqarsimasut kulturit oqaatsillu assigiinnginneri nalilersuinermut ilaatinneqartarsimanngimmata. Folketingimi ilaasortat isumaqarput suliat naammassereersimasut nalilersoqqinneqartariaqartut.

- Maanna ajornartorsiutaavoq angajoqqaat piginnaasaannik misissuisussanik kalaaliusunik, kalaallilluunniit atugaannik ilisimasaqartunik, kommunit sulisussaqanngimmata. Angalaqatigiittunilli peqarsinnaavugut kalaallit psykologit inunnillu isumaginnittut sulianik naammassisimasunik nalileeqqikkiartortillugit angalatinneqarsinnaasunik, Aaja Chemnitz Larsen Sermitsiaq.AG-mut oqarpoq.

Sullissinermi angalasartoqatigiit

Aki-Matilda Høegh-Dam isumaqarpoq suleqatigiinnik angalasartoqatigiinnik pilersitsisoqartariaqartoq, angajoqqaat piginnaasaannik nalilersuisoqarnerani suleqataasussanik.

- Angalasartoqatigiit aamma nutserisoqassapput, oqaatsitigut nutserisumik, aammali kulturikkut assigiinngissutsit pillugit nutserisartussamik nassuiaasartussamillu. Tamassuma angajoqqaat kalaallit sullinneqarnerannik pitsaanerulersitsissaaq, Aki-Matilda Høegh-Dam oqarpoq.

- Task Forcemik pilersitsinermi angajoqqaat aamma kommunini sullissisut nalilersuisartullu ikiorneqassapput, kulturikkut pissuseqariaatsikkullu nassuiaasussamik peqalissammat, Aki-Matilda Høegh-Dam oqarpoq.

Misissuutit nalimmassartariaqarput

Siunissaq ungasinnerusoq eqqarsaatigalugu, misissuutit kalaallinut tulluarsarneqarnissaat anguniarneqassasoq, folketingimi ilaasortat isumaqarput.

Misissuutit nalimmassarneqarnissaat nutserisoqartalernissallu saniatigut Danmarkimi kalaallinut meeqqat angerlarsimaffiannik, kalaallinit ingerlanneqartumik, pilersitsinissaq aamma suliniutigineqarumavoq. Kalaallit meerartaat angerlarsimaffiup avataanut inissinneqartillugit kulturi oqaatsillu annaaneqannginnissaat pillugu.

Powered by Labrador CMS