Aaja aamma Aki-Matilda Folketingimut qinigaaqqipput
Siumut aamma Inuit Ataqatigiit Folketingimi ilaasortaatitaqaqqilerput. Qinersinerit kisinneqareerneranni tamanna paasinarsivoq.
IA ikinnerusunit qinerneqaraluartoq, Siumullu siuariaateqarluaraluartoq, taamaatullu Demokraatit Nalerarlu unammillertaalluarsimagaluartut, IA aamma Siumut qinersinermi angusarissaarnerpaapput folketingimilu ilaasortaatitaqaannassallutik.
Qinersinermi ajugaasuuvoq Siumumeersoq Aki-Matilda Høegh-Dam, 7.000 missaannik taajuunneqarluni. Qinersinerullu inerneri marlunngornermi unnukkut qularnarunnaarmata Sermitsiaq.AG-mit oqaloqatigineqarami nuannaarluinnarpoq.
- Siumut ajugaarujussuarpoq, tamannalu nuannaarutigaara. Unneqqarinnerput ersarissumillu politikkeqarnerput qinersisartut maluginiarsimavaat. Qineqqusaarnermi politikkerput ersarissassallugu ilungersorsimavugut, qinersiviullu kingulliup ingerlanerani angusagut aamma oqaluttuarisarlugit. Tamanna kinguneqarluarpoq.
Mette F.-ip ajugaanini qanoq atussaneraa utaqqimaartoq
Qinigaaneq qanoq atorneqassanersoq pillugu qulakkeerinninnissamut, Mette Frederiksenip alloriarnissaa tulleq utaqqineqaqqaarallassaaq.
- Danmarkimi naalakkersuisuutitaqalernissamut isumaqatiginninniarnerit qanoq ingerlassanersut takoqqaalaartariaqassavarput, qularineqassanngilarli nunarput tamaat sinnerlugu partiillu tamaasa suleqatigalugit nunatsinnut Folketingimi iluaqutaasussaq anguniassagatsigu.
Danmarkimi qinersinerup inerneri isumaqarput nunat avannarliit Folketingimi sunneeqataasinnaasorujuussasut, Mette Frederiksen saamerliunerusunik naalakkersuisuutitaqalernissani anguniassappagu. Ministeriunerulli qineqqusaarnermi tamanna illuatungilertuartarsimavaa, talerperliunerusunilli suleqateqarsinnaaneq kissaatiginerarsimallugu.
Mette Frederiksen nunarput pillugu oqaaseqartuussaaq
Mette Frederiksen talerperliunerusunik suleqateqarniassappat, nunatsinniit folketingimut sinniisunngortut, naalakkersuisuutitaqalernissamut pingaaruteqarpallaassanngillat. Folketingimi amerlanerussuteqassagaanni ilaasortat 90-iusariaqarput. Partiillu saamerliunerusut talerperliunerusullu arlaannaalluunniit 90-it angunngimmatikkit nunarput isumaqatiginninniarnermi sunneeqataasinnaagaluartoq, saamerliunerusut talerperliunerusullu suleqatigiinniassappata, nunatsinnut tamanna periarfissalunnerulersitsisinnaavoq.
- Ministeriunerusinnaasumik taasisimatilluta tamanna isumaqarpoq taasarput isumaqatiginninniarnermik ingerlatsisuusariaqartoq, nunarpullu sinnerlugu Folketingimi isumaqatiginninniarnernik aamma ingerlatsisuussaassasoq, Aki-Matilda Høegh-Dam oqarpoq.