Piniarneq

Aaffanniartarnerit piujuaannartitsinermik tunngaveqarput – qilalugarniarnerli taamaanngilaq

Ukiup siulianut sanilliullugu, piujuartitsinianermik tunngaveqarluni aaffanniartoqartarnera nalunaarutigineqarpoq.

Biologit Pinngortitaleriffimminngaanneersut ukiup siulianut sanilliullugu, piujuartitsinianermik tunngaveqarluni aaffanniartoqartarnera nalunaarutigaat.

Tamanna aamma tikaagulliit qilalukkallu qaqortat Nunatta kitaata imartaaniittartunut atuuppoq. Pinngortitaleriffik tusagassiuutinut nalunaarummini allappoq.

Nunatta imartaaniittartut miluumasut akuersissummik tunineqarsinnaanngitsutut nalilerneqartut - tassa imannak paasillugu; taakkuninnga piniarneq piujuartitsiniarnermik tunngaveqarsimanngimmat - ukuupput: qilalukkat qernertat, nannut arferillu mikinerit arlallit; soorlu niisa, niisarnat, aarluarsuit aarluillu. Tassa miluumasunit taakkkunanngaanneersunik tunisassianik Kalaallit Nunaat nunanut allanut niueruteqarsinnaanera inerteqqutaatinneqartariaqaraluartoq naliliiffigineqarluni.

Pinngortitaleriffiimminngaanneersut CITES sinnerlugu nalilersuinernik suliaqartarput. Pinngortitaleriffimmeersut CITES sinnerlugu siornali periuserilikkaminnik ukiumoortumik NDF-mik taaneqartartumik nalilersuinernik suliaqartalerput.

Qilalukkat qernerat piniapilunneqartut

Pinngortitaleriffimmi biologit qilalukkanut qernertanut tunngatillugu akuersissuteqarsinnaasimanngillat qilalugaqarfiusuni Qimusseriarsuarmi, Ittoqqortoormiini Tasiilamilu qilalukkat qernertartarineqarsimasut biologit siunnersuineri aallaavigalugit pisassiissutaasimasunit amerlanerusimammata.

Taamatut aamma nannut arferillu minnerit allat akuersaartumik naliliiffigineqarsinnaasimanngillat, taakkununnga tunngatillugu ilisimatuussutsikkut siunnersuisoqarnikuunngimmat.

CITES pillugu isumaqatigiissut Nunatsinnit 1992-imi atsioqataaffigineqartoq naapertorlugu pineqartunit nioqqutissianik avammut niueruteqartarnerit ikiliartuutaanngitsumik ingerlanneqarnerat aatsaat ilisimatuussutsikkut uppernarsarneqarsinnaappat akuersissummik tunisisoqartarpoq. Isumaqatigiissut naapertorlugu nunarput pisussaaffiligaavoq tunngaviusumik mianersortumik periuseqarnissamik maleruaqqusaq naapertorlugu pinngortitamik illersuisussaatitaalluni, uumassuseqarnerup assigiinngisitaassuseqarnerata attannissaanik aammalu piujuartitsinermik tunngaveqartumik pisuussutinik iluaquteqarniartussaatitaanermik qulakkeerinnittussaatitaalluni.

Piujuartitsiniarnermik nalunaarusiat Naalakkersuisunut tunniunneqartarput, taakkuuppullu CITES-ip miluumasunut imarmiunut tunngatillugu allattorsimaffiutaaniittunit uumasunit tunisassiat nunatta avataanut tunisassiarineqarsinnaanerinik mattussinermik ammaassisinnaanermilluunniit aalajangiisartut.

Powered by Labrador CMS