nassuiaat
A1-imi pissutsit pillugit IA nassuiaateqaqqusivoq
– A1-imi tarnikkut nappaatillit atugarisaasa iluarsineqarnissaat pisariaqarluinnarpoq. Peqqissutsimut Naalakkersuisoq nassuiaateqartariaqarpoq, Agathe Fontaine, Inuit Ataqatigiit, oqarpoq
Dronning Ingridip Napparsimmavissuani immikkoortoqarfimmi A1-imi pissutsit Sermitsiap allaaserereeraalu, tamatumani uppernarsarneqarluni pissutsit sulisunut uninngasunullu erloqinartuusut, Agathe Fontainep, Inuit Ataqatigiit, piumasaraa peqqissutsimut Naalakkersuisoq Steen Lynge, Atassut, akulerutissasoq.
– A1-imi pissutsit erloqinartut pissutigalugit Inuit Ataqatigiit piumasaraat Peqqissutsimut Naalakkersuisut Peqqissutsimut Ataatsimiititaliamut nassuiaateqassasoq, aammalu nalunaarutigalugu pissutsit pitsanngorsarnissaannik piumasaqaammut qanoq iliuuseqarniarnerluni. Ajornartorsiut aaqqinneqassappat isumaqarpugut politikkikkut piviusorsiortumik pilersaarusiortoqassasoq, Agathe Fontaine, Inuit Ataqatigiit sinnerlugit ilaasortaq, oqarpoq.
– Inuit Ataqatigiit pissutsit A1-imi maanna atuuttut erloqinartutut isigaat. Tarnikkut nappaatillit imminnut illersornissaminnut periarfissaqanngillat, tamannalu pissutigalugu isumaqarpugut ulluinnarni atugaasa iluarsineqarnissaat pisariaqarluinnartoq. Isumaqarpugut pissutsit aatsaat pitsaanerulissasut A1-mi sulisunut uninngasunullu pissutsit tamaviisa iluarsineqareerpata, Agathe Fontaine oqarpoq, piumasaraalu Steen Lynge A1-imi pissutsit pillugit nassuiaateqassasoq.