A: Nunaminerals annaanniarlugu Naalakkersuisut iliuuseqarsinnaajunnaarput

Nunaminerals ulluni tulliuttuni matusariaqalinnguatsiarpoq.

Namminersorlutik Oqartussanit aningaasat atukkiunneqartut suli utertinneqarsinnaanngillat, aamma ataavarnissamut suliffeqarfik Namminersorlutik Oqartussanit ilaannakortumik pigineqartoq ingerlanneqarsinnaanani.

Nunaminerals pillugu aamma Atassut isumalluanngilaq.

- Nunamineralsip ingerlannarnissaa Naalakkersuiunit sulissutigineqartareerpoq (aktiat nalingat 0 koruuninngortinneqarput Københavnimi fondsbørsenimi ilaasortaajunnaarnermi. Tamanna Naalakkersuisunit siunnersuutigineqarpoq suliffeqarfiup ataatsimeersuarnerani januaarip 29-ani.) Aatsitassarsiornikkut ingerlaneq pitsaasuunngilaq. Taamaattumik aamma suliffeqarfik nalimmassarluni aamma ineriartorsinnaasimanani, Steen Lynge allappoq.

'Nikorfasinnaasut nikorfassasut nikorfasinnaanngitsullu nakkassasut' oqaatigaa.

Iluaqutaanngitsoq
Inuit Ataqatigiinnit Naalakkersuisut pisuutinneqarput Nunamineralsip ingerlaneranut, kisianni Steen Lyngep Naalakkersuisut illersorpai.

- Nunaminerals suliffeqarfiuvoq aarlerinartumik ingerlasinnaasoq. Aktianik pisigaanni assigiinnarpaa lottomik pisilluni. Suliffeqarfinnik taamatut ittunik pisigaanni ajugaasoqarsinnaavoq ajorsartoqarsinnaalluniluunniit.

- Nunaminerals politikkikkut pitsaanngitsumik angusaqarfiuneruvoq iluaqutigineqarneranit, Atassutip politikkikkut siulittaasuata tullia Steen Lynge Sermtisiaq.AG-mut oqarpoq.

Nunamineralsip aktiaannik danskit fondsbørsiatigut Københavnimiittumi pisisinnaaneq unitsinneqartoq tallimanngornerup ullaani Ritzau Finansimit nalunaarutigineqarpoq.

Nunaminerals A/S-ip aktiaataat aktiamut ataatsimut 5 koruunimit 10 oorinut appartinneqarpoq januaarip 29-ani. Suliffeqarfiup nammineq aningaasaatai 137.954.700-ninit 2.759.094 koruuninut appartinneqarput, taakkulu annaasanut matussusissapput.