toqutsineq
72-inik ukiullip Tasiilami toqutsinini nassuerutigaa
Tasiilami januaarip 13-anni ukiormanna arnap 29-nik ukiullip toqunneqarnerani politiit misissuinerit naammassiliivippaat
Januaarip qaammataata qeqqani angutip 72-inik ukiullip arnaq 29-inik ukiulik aallaallugu toqussimallugu nassuerutigaa. Politikommissær Mathæus Larsen Sermitsiaq.AG-mut ilisimatitsivoq.
Toqutsineq januaarip 13-anni pivoq, tamannalu illoqarfimmi sapaatip akunnerani alianareersumi pivoq, tassa arnat inuusuttut marluk imminooreersullu.
Unnerluunneqartup angerlarsimaffiani pisoq
72-inik ukiullip angerlarsimaffiani toqutsineq pisoq, Mathæus Larsen ilisimatitsivoq.
- Taakku imminnut ilisarisimapput ulluinnarnilu naapittarlutik, politikommissæri ilisimatitsivoq.
Atuaruk: Taasilami inuartarinninneq politiinit misissorneqarpoq
Angut toqutsinerup kinguninngua tigusarineqarpoq, januaarillu 14-anni tunngaviusumik inatsit naapertorlugu killisiorneqarpoq, utaqqiisaasumillu ulluni 26-ni tigummigallartussanngorneqarnikuuvoq.
Unnerluunneqartoq suleqataasoq
Taanna 72-inik ukiulik Tasiilami tigummigallarneqarpoq.
- Taassuma toqqortuinani toqutsinini nassuerutigaa, Mathæus Larsen oqarpoq.
Atuaruk: Tasiilarmiut anorersuarmi neriuummik ikitsisut
Politiit paasiniaanerup annerpaartaa naammassereerpaat, kisianni teknikkikkut misissuinerit kingulliit inerneri utaqqivaat. Paasiniaanerulli naammassivinnginnerani toqutsinermut suna pissutaanersoq politiit oqaatigerusunngilaat.
Qaammat naalernerani inernerit kingulliit pissarsiarineqarpata, suliaq eqqartuussivimmut ingerlateqqinneqassaaq.