600 Qooqa: Aqua putorujussuartoq
Aalisartoq piniartorlu Ilulissat eqqaani tikiffissaminit 90 kilomiiterisut ungasissusilimmiitsilluni umiatsiaminik putusoorpoq. Umiatsiaq immikkut issussarneqarsimagallartillugu immaganilu nunamut tikissinnaasimavoq.
Taamaallaammi alippallassuarpoq!
Aalisartoq imaatigut angalanermini tupannartumik misigisaqarpoq, sapaatip akunnerani kingullermi sisamanngornermi imaatigut angalatilluni umiatsiaa aquatigut putuvoq.
Piffissami kingullermi umiatsiap aqumigut putusimasup assigi nittartakkani attaveqatigiiffiusuni ingerlaartinneqarput. Angallammillu Qooqamik nassiussuisartoq Jørgensen & Dahl A/S taamaasilluni pisumik aamma ilisimatinneqarsimalluni.
- Nangaanartoqartippallaarnagu qularinngilarput angalanermini arlaannut kallussimassasoq, Søren Risbjerg, Jørgensen & Dahl A/S-imi tuniniaanermut siunnersorti, Sermitsiaq.AG-mut ilisimatitsivoq.
Umitsiaaraq Qooqa Jørgensen & Dahl A/S naapertorlugu Kalaallit Nunaata imartaanut angalasinnaasutut sanaajuvoq, Søfartsstyrelsellu sikusiuinermut malittarisassai malillugit Isklasse F-tut nalilerneqarsimalluni. Tassa sikusiullaqqinnerulluni ajoqusiannginnerullunilu. Umiatsiaq 6 miiterisut takitigaat, 2,6 miiterisullu silissuseqarluni, glasfiberinillu qaleriinnik arlalinnik issussarneqarluni sanaajulluni. Umiatsiaq sukkasuuliamik mootoreqarsinnaavoq, naatsorsorneqarsimallunilu 400 hk-mik motooreqarsinnaasoq. Tassa angallat nunatsinni angallatigissallugu isumannaalluinnartoq.
Umiatsiaaraq Mercury Marinep nittartagaani 171.790 koruuneqartutut allassimavoq, taassumallu saniatigut motoori nunatsinnullu assartortinneqarnera aamma akilerneqassallutik.
Umiatsiaaraq Qooqa kalaallit aalisartut piniartullu peqatigilluinnarlugit suliarineqarsimavoq, nunattalu imartaani angallatitut isumannaalluinnartutut suliaasimalluni.
- Kalaallit Nunaata imartaata peqqarniilluinnarsinnaanera pillugu ilisimasaqarpugut, taamatullu aalisartut piniartullu isorartuumut angalasariaqartarnerannut ilisimasaqarluta. Taamaammat pissutsinut taamaattunut tulluartumik, useqarluarsinnaasumillu sanasimavugut, Søren Risbjerg oqarpoq.
Taassuma ilisimatitsissutigaa umiatsiaararsortut allat 100-t missaanniittut assiganik umiatsiaqartut. Umiatsiamillu putusoortoqarsimaneq tusagaq siulliusoq.
Misissorneqassaaq
- Suliarinerani kukkuluttortoqarsimasinnaanera suli mattutinngilarput. Taamaammat umiatsiaaqqamik piginnittoq attavigereerparput, umiatsiamillu nutaamik taarsiiumaffigalugu, Søren Risbjerg oqarpoq.
Tuniniaanermi siunnersorti Søren Risbjerg ilisimatitsivoq Ilulissani umiatsiamik tuniniaasoq attavigereersimallugu, taamatullu umiatsiaatilik attavigineqarsimasoq. Nammineerluni Ilulissanut novemberip qiteqqutilernerani angalassaaq umiatsiaq alakkarlugu, ataatsimeeqateqariartorlunilu.
Umiatsiaq Danmarkimut nassiunneqassaaq, amutsivimmilu misissorneqarluni.
Umiatsiamik nassiussuisartut pisoq pinartutut nalileramikku umiatsiamik misissuissallutik aalajangerput.
- Nuannaarutigisorujussuuarput aalisartoq imaatigut 90 kilomiiterisut isorartutigisumik angalasimasariaqarsimasoq ajoranilu apuussimasoq. Umiatsiarluunniit immassimanngilaq. Assit tigusagut naapertorlugit takusinnaavarput umiatsiaq silataannaatigut putusimasoq, iluanilu glasfiberit qaleriit putusimanngitsut. Aamma takusinnaavarput aquuteralaap motooriata sarpia innarlersimasoq, taamaammat qularutiginngilarput arlaannut manngertumut kalluisoorsimasoq, Søren Risbjerg nassuiaavoq.
Umiatsiaq taarserneqassaaq
Jørgensen & Dahl A/S umiatsiamillu suliaqartoq Askeladden Norgemeersoq aalajangereersimapput umiatsiaaqqamik piginnittoq nutaamik taarsiivigissallugu. Tamanna pillugu tuniniaanermi siunnersorti Ilulissiassaaq, pisoq pillugu suliallu ingerlaqqinnissaa pillugu oqaloqateqariartorluni.