60-inik ukiullit inatsisitigut aporfeqalersinnaasartut

Inuk innarluutilik 60-inik ukioqaleraangami inatsisitigut aaqqissuussaanermit tammartutut ittarpoq.

Aaqqissuussaanermi imaappoq, inuit annertuumik innarluutillit ikiorserneqartarnerat pillugu inatsisartut peqqussutaat 1993-imeersoq naapertorlugu, kommuni pisussaavoq ikiuutissalluni inuk suli 60-iliisimanngippat.

- Tamanna ilungersunartorsiortitsilersarpoq, pissutigalugu utoqqaat innarluutillit utoqqalinersiat pillugit inatsimmut taarsiullugu ilanngunneqartarmata, tamannalu inatsit innuttaasunut 65-it qaangerlugit ukiulinnut taamaallaat atuuppoq. Tamanna inatsisiliornermi putuuvoq, utoqqalillutillu innarluuteqalersut takulertussallugu ajornakusoortissinnaavaat, nalunaarusiami allassimavoq.

Inatsisini putu taanna isumaqarpoq, utoqqaat innarluuteqalersut 60-iilernerminnit 65-inik ukioqalernissamik tungaannut ikiorneqarnissaminnut ajornakusoortitsisalertarmata.

- Utoqqalinermi innarluuteqalersut atugarliortuupput, kommunimut ikiortissarsiussallutik isumalluutissaqannginnamik, allassimavoq.

Inuit innarluutillit illersuisuat Tiliumi sulisut marluk peqatigalugit Kommune Kujallermi augustip qulinganit 23-ata tungaanut angalavoq. Angalanermi inuit innarluutillit pisinnaatitaaffii pillugit Tilioq paasissutissiivoq, kommunimilu inuit innarluutillit atugaannik paasiniaalluni.

Innersuussutit

Inuit innarluutillit illersuisuata Christina Johnsenip angalanermit nalunaarusiamini innersuussutigaa inatsit allanngortinneqartariaqartoq, ullumikkut atuuttunut tulluarnerulersillugu inuillu innarluutillit tamarmik ikiorneqarnissaat anguneqarsinnaasunngorlugu.

- Inatsisartut inatsisiliussasut tamakkiisumik sammisumik aamma inuunermut tamarmut isigisumik, taamaalilluni piginnaanikillinerit, innarluutit aamma ukioqqortussutitigut immikkoortut mininneqassanngitsut, allassimavoq.

Tamatuma saniatigut utoqqaat ilaat, tusillakkiartortut, tappingeriartortut pitsorlussiartortullu namminneq illuminnik BSU-mi illuni najugaqarput, namminnerli piginnittutut illumik aaqqissuinermik innarluutertik malillugu isernissamut qummakartarfimmut, majuartarfiit sinaakkutaannut allanullu tapiiffigineqarsinnaanatik.

Nalunaarusiaq naapertorlugu eqimattat taakku inissianut nooqqullugit, illortillu tunillugu.

Inuit innarluutillit illersuisuata illuatungaatigut innersuussutigaa utoqqaat namminneq illuutillit innarluuteqalersimasut ikiorneqartalissasut, illuminnik annaasaqannginnissaat anguniarlugu.

- Kommune Kujalleq Namminersorlutik Oqartussat suleqatigalugit inunnut innarluutilinnut namminneq najugaqartunut ammaassissasut tapiisarnernik imaluunniit inissianik inunnut innarluutilinnut naleqqussakkanik innarluutilinnut inissiani attartortitsisarnermut assingusunik taarsingassarsisarnissaannik, Tilioq innersuussivoq.

Tilioq angalanerminit nalunaarusiamini katillugit 27-inik innersuussuteqarpoq, innersuussutit Kommune Kujallermut, Namminersorlutik Oqartussanut, Naalakkersuisunut, Inatsisartunut, peqqinnissaqarfimmut allanullu inuiaqatigiinni susassaqartunut sammitinneqarput.