Skip to main content

59-6-imik ajorsarneq ima qaangerneqarsinnaavoq

K-33-ip arnartai assammik arsarnermi pissartanngorniunnermi ajorsarujussuaqattaaraluarlutik tunniutiinnarneq ajorput

K-33 GSS-imut pingasunngormat unammigamik 6-59-imik ajorsarput, marlunngormat NÛK-mooramik 35-13-mik ajorsarlutik.

Qiimmassaqatigiittuarneq holdip iluani pingaaruteqarluartoq sungiusaasuusut Rudolf Vetterlain aamma Bruno Josefsen Sermitsiaq.AG-mi oqarput.

- Unammisartutta takutitaat naammagisimaarluarparput. Qanorluunniit ingerlagaluarutta unammisartut imminnut kaammattuunnavillutillu qiimmassaannavittarnissaat unamminnginnermi isumaqatigiissutigereertarparput. Tamanna NÛK-mut unamminermi unammisartutta takutippaat. Tunniutiinnanngillat, unamminerminni qiimapput illersuilluarlutillu. Tamakku sungiusaqatigiittarnitsinni pingaartitarinikuuagut, illersuilluartut nalilerparput. Saassusseriaatsit assigiinngitsut aappaagumut GM-ertoqarnissaanut sungiusarnerujumaarpagut, Rudolf Vetterlain oqarpoq.

Angusarissaarluartarnikuupput
K-33 Qaqortumeersoq siornatigut arnani angutinilu unammersuaarnerni angusarissaartarnikuupput, tamarmik arlaleriarlutik ujaminnattarnikuullutik.

K-33-mi sungiusaasoq Rudolf Vetterlain (saamerleq)
Leiff Josefsen

Ukioq kingullernili K-33 aamma kujataamiut timersoqatigiiffiit allat unammersuaarnerni peqataanikuunngillat, ukioq mannali K-33-ip arnartai peqataallutik. Kingullermik 2011-mi unammersuaarnermi peqataapput, angutitai kingullermik 2014-mi peqataallutik.

- Timersuut ukiuni kingullernisut soqutigineqarunnaarnikuuvoq, taamaattumik aallaqqaaterpiaanit aallartisaaniarluta aaqqissuussinikuuvugut. Pissutsit assigiinngitsut pissutaallutik ukiuni kingullerni peqataatitaqarneq ajorpugut, tassami ilaatigut unammisartut, aningaasatigut tapissutit aamma kajumissutsimik tapersersuisut amigaatigisarnikuuagut, qujanartumilli ukioq manna peqataavugut, Rudolf Vetterlain oqarpoq.

Oktobarimi kingullermik unammisut
Ukiuni kingullerni K-33-ip niviarsiarartai unammersuaaqataasarput, inersimasortai uninnganerullutik.

- Narsami oktobarimi kingullermik unammivugut. Uggornarpoq unamminerit amerlanerusut aaqqissuunneqarsinnaasimanngimmata, taamaattumik arnat imminnut unammisarput, ilaatigullu aamma angutit sungiusaqatigisarlugit, Bruno Josefsen oqarpoq.

Sungiusaasup aappaa Bruno Josefsen
Leiff Josefsen

K-33 kingullermik pissartanngormat Bruno Josefsen arsaqataavoq, tamanna 2003-mi pivoq.

- Tamanna pereersoq suna tamarmik ammukariartortutullusooq ippoq, taamaammat timersoqatigiiffiup inissisimanera maannakkut takullugu soorunami annernarpoq. Unammisartuusimasut misilittakkatik inuusuttunut ingerlateqqinnikuunngimmassuk kukkusoqarnikuuvoq, taamaasilluni kinguaariit nikinnerat perianngitsoorluni. Tamanna unammisartuusimasut kukkussutigaat, oqarpoq. Assammik arsarnerup soqutigneqarunnaariartornera arlalitsigut pissuteqartoq tikkuarpaa, tassani periarfissat timersornermut amerlisimaneri kiisalu kattuffimmit aamma tikeraarneqartannginneq ilaatigut peqqutaanerarlugu.

Sungiusaasulli taakku assammik arsarneq nuannarisorujussuuaat, tamannalu pissutigalugu sungiusaarusussuseqarluarlutik.

- Unammisartuutivut kaammattorluarniarlugit sungiusarnernut aggertuarpugut. Sungiusariarnerni ilaannikkut sisamat tallimaannaat takkukkaluartut nikallussutiginagu aggertuarluta. Soorunami ilaatigut apeqqusernartarpoq ilumut sungiusaasuuginnassanerlunga, akerlianilli eqqarsartarpunga takkuttarunnaaruma assammik arsartartuerutissasoq. Sungiusaasutut uninniarlunga eqqarsaatiginikuugaluarpara, kisianni unammisartut takoreerlugit suli piumassuseqarluarlunga paasivara, aappaagumullu aamma sungiusaasoorusullunga, Rudolf Vetterlain oqarpoq.
 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER