internetti
4G-mik atuisinnaanngorpugut
Nuummi, Qaqortumi Sisimiunilu mobilinik atuisut mobiliminni 4G-mik atuinissamut periarfissaqalerput
Mobilimik atuisut mobiltelefoniminni sapaatip-akunnerani matumani sukkanerusumik internettersinnaanngorput.
Tele Nuummi, Qaqortumi Sisimiunilu 4G-mik attaveqaammik sapaatip-akunnerani matumani siusinnerusukkut ammaavoq. Piffissaq misileraaffiugallartoq pineqartoq, Tele-Post tusagassiorfinnut nalunaarummi allappoq.
Qanimut oqaatigalugu Mobil Mikisumik, Mobil Akullermik aammalu Mobil Angisuumik atuisut taakkuupput atuisinnaanngortut.
- Sullitavut amerlaqisut attaveqaammik sukkanerusumik atuisinnaalernerat nutaarsiassaavoq nuannersoq. Piffissami qaninnerpaami attavik misilittassavarput, misilittaanerpullu iluatsissappat siunissami TUSASS-imik atuisut aamma atuisinnaanngortissavavut, innuttaasunut kiffartuussivimmi qullersaq Per Svendsen nassuiaavoq.
Piffissami misilittaanermi TELE-POST-ip sukkassutsit aallernermi 10 Mbit/s aamma nuussinermi 2 Mbit/s neqeroorutigai.