Skip to main content

360 videomik: VG-p takornariassarsiorluni malussarniutit atorluarpai

Visit Greenlandip (VG) malussarniutit atorlugit nunap nuannissusaa nunarsuarmiunut takutinniarpaa.Visit Greenlandip malussarniutit atorlugit nunap nuannissusaa nunarsuarmiunut takutinniarpaa.

Takornariat amerlanerpaat qanoq iliorluni tikisinnissaat Kalaallit Nunaanni takornariartitsivimmut apeqqutaasuaannarpoq.

Teknologi nutaanerpaaq tamatumunnga atorluarneqarsinnaasoq Visit Greenlandimi suleqataasut qularutiginngilaat: tassalu VR – Virtuel Reality – qarasaasiaq atorlugu piviusumik takutitsineq imaluunniit kaajallallugu assilisat.

Maluginiutit atorneqalerput
Aningaaq Pelé Rosing Carlsen, takusassanik suliaqarnermut aqutsisoq, isiginnaartussanut paasinnilersitsisinnaasunik immikkuullarissunik suliaqarluni VR-inik 2016-imi novembarimili filmiliorluni aallartippoq.

Sermitsiaq.AG-p tusagassiortua Visit Greenlandip Nuummi qullersaqarfiata ataatsimiittarfianiilluni qimussernissaminut iluatsitseqaluni neqeroorfigineqarpoq.

Illoqarfik Nuullu kangerlua seqinnarissuuvoq. Ataatsimiittarfimmiitillunga isiginnaarutissakka isaruaasat ativakka Tasiilamilu pinngortitaq kusanarluinnartoq qamutini issiasuusillunga isigisinnaalerataarlugu.

Misigisaq sammisassarpassualik
Qamutit perlaavisa nipaat, qaalluarpalaaq aamma qimmit qiluppalunnerat siutequtikkut tusaasinnaavakka sumullu qiviaraangama aput qaallorisoq nunami kusanartumiittoq isigisinnaallugu soorluli talera siaarukku attoriaannaallugu. Qimusserlu ingerlalluataalaavippoq.

Tunumut tuikka qulaallugit qiviarpunga qimmerlu ataaseq kingulerussimavoq.

”WOAW”, taqqamani nillerpunga.

”Pikkunarnerusinnaava?”, eqqarsarpunga.

Tassa, tunniutiinnarpunga!

Tassalu Visit Greenlandip VR atorlugu misigisaqartitsilluni taamaasisoqarnissaa anguniarpaa.

Takornariartitsisartut nuisitsinissaat
Nunat avannaamiut takornarianik nuisitsisarnerat, Vestnorden Travel Mart, septembarimi Nuummi pissaaq, tassanilu takornariartitsisartut Islandimeersut, Savalimmiuneersut Kalaallit Nunaanneersullu nuisitsisarput.

Angalatitsisartut, takornariartitsisartut aamma tusagassiortut nunanit assigiinngitsuneersut hundredelippassuit tassunga peqataassapput taakkulu takusassaannik ilungersuuteqarnermi VR immikkorluinnaq atuuffeqarluni.

Nuisitsinermi peqataasunut issiaartarferujussuarmik sanasoqassasoq qarasaasiakkut tuniniaanermut siunnertorti, Aviaja Lyberth, oqaluttuarpoq. Taassuma qeqqani qaqisarfeqassaaq natiani sumiissusersiutitut ittumik peqassalluni. Tassani VR-imut isaruaasat immikkut ittunik isiginnaarfiusinnaasut toqqarneqarsinnaapput isiginnaagassanillu nunatsinneersunik assigiinngitsunik isiginnaarfiusinnaallutik: Avannaanit, Kujataanit, Kitaanit Tunumiillu.

VR-ikkut isiginnaarneqarsinnaasut
Tunumeersunik isiginnaarusukkaanni kaajallallugu assilisamik oqaluttuarisatsitut qimusserluni filmertoqarsinnaavoq Tasiilallu eqqaani aasami imaatigut angalanermik isiginnaartoqarsinnaalluni.

Kujataanit filmigassat tassaapput Uunartoq, kangerlunni qajartorneq nunaateqarfinnilu pisuttuarneq.

Avannaanit takuneqarsinnaasut tassaapput angallammut ilaalluni arfersiorneq Ilulissallu eqqaanni alianaatsumi ukiumi angalaneq, aammali soorunami Sisimiut Kangerlussuullu akornanni qamuteralannik ingerlaarneq isiginnaarneqarsinnaalluni. Nuummit isiginnaagassani illoqarfikkoortoqarsinnaavoq oqaluttuarisaanermullu tunngasut alakkarterneqarsinnaallutik.

Filmiliarpassuit takornarialerinermik inuussutissarsiortuinnarnit isiginnaarneqarsinnaassanngillat. Filmiliammi nittartakkani assigiinngitsuni isiginnaarneqarsinnaalissapput, soorlu Youtubemi, facebookkimi aamma Visit Greenlandip nammineq nittartagaani.

Youtubemi isiginnaagassaq annikilliallassimasussaavoq. Takusassaq pissusiviatut isiginnaarsinnaassanngilat filmiliuulli sangutissinnaavat qanorlu isigerusunnerlugu nammineq aalajangerlugu.

Ooqattaagassaat ajunngilluinnartut

Visit Greenlandip Kalaallit Nunaat takornariarfigalugu ooqattaagassat ajunngilluinnartut pilersissimagai Aviaja Lyberthip aamma Aningaaq Pelé Rosing Carlseni isumaqarput.

- Suliarput ilikkarfigeqaarput. Unammillernartarsimavoq, pingaartumik arsarnernik assiliiniarnerput, sinnerali ajorsimanngilaq, takusassanik suliaqarnermut aqutsisoq Aningaaq Pelé Rosing Carlsen oqarluttuarpoq. Taanna filmiliornermut, tv-liornermut teknikeritullu ilinniarfimmi Viborgimi ilinniarsimavoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER