300-innaat apriilimi nunatsinnut tikissimapput
Corona pissutigalugu matusisoqarnerata kingorna Danarmkimiit Kangerlussuarmukartartut ikileriarujussuarsimapput. Apriilip qaammataanni tikittut ikinnerpaasimapput, tassa ilaasut 316-iinnaat nunamut tikissimagamik.
Naalakkersuisut martsip 18-iani nuna matummassuk, Danmarkimiit tikittartut ikinnerulersimanerat tupaallaatissaanngilaq. Tikittartulli ikinnerulersimanerat malunnaqaaq.
2019-imi apriilip qaammataani Danmarkimiit Kangerlussuarmut tikittut 5199-iusimapput. Ukioq manna apriilip qaammataani 316-iusimallutik.
Maajip qaammataani tikissimasut amerlanerulaarput 51-iusimagamik, siorna qaammammi pineqartumi 5290-iusimallutik. Martsip qaammataani tikissimasut aamma ikileriangaatsiarsimasut takuneqarsinnaavoq, tassungali atatillugu eqqarsaatigineqassaaq matusineq aatsaat martsip 20-ani atuutsinneqalermat.
Danamrkimut arriitsumik ammariartuaarneq
Naalakkersuisut juunip 15-iani ammariartuaarnermi immikkoortoq siulleq atuutsilerpaat, taamaalilluni Danmarkimiit nunatsinnut sapaatip akunneranut tikissinnaasut maanna 600-nngorlutik. Danmarkimit tikinnermi coronaut misissortittarnissaq mattusimanissarlu piumasaqaataapput.
Peqatigitillugu Islandimiit Savalimmiuniillu killeqanngitsumik tikittoqarsinnaanera ammaanneqarpoq, piumasaqaataaginnarlunili Danmarkip Islandillu naalagaaffiini innuttaasuussasut, ulluni 14-ini kingullerni Islandimiissimallutillu Savalimmiuniissimasut.
Air Greenland juunip 17-ani Reykjavikimiit Nuummut sapaatip akunneranut marloriarluni timmisartuussisarnissamik aallartitsivoq. Air Island Connect sapaatip akunnerani kingullermi ilannguppoq, aqqummilu tassani sapaatip akunneranut ataasiarluni ingerlaartalerluni.
