Ineqi Kielsen blev sapaatip akunnerata ataatsip matuma siorna partiimi siulersuisunit attavigineqarsimavoq aperineqarlunilu Tunngaviusumik inatsisissaq pillugu Isumalioqatigiissitami siulittaasunngorusunnginnersoq, siulittaassuuffik Doris J. Jensenip qaammatialuit siulittaasutut atuutereerluni qimappaa, Inatsisartuni ilaasortaanermini aningaasarsiaqareerluni atorfimmut atatillugu aningaasarsiaqartinneqarnissaq itigartinneqarmat.

- Siulittaasunngornissamut neqeroorfigineqarnera nuannaarutigaara, Ineqi Kielsen Sermitsiaq.AG-mut ilisimatitsivoq.

Aorfinitsinneqarnissaq Naalakkersuisunit akuerineqarnissaa utaqqimaarpaa. Tamatuma kingorna allanik oqaaseqartinnani tunngaviusumik inatsisissap suliarineqarnera sumut killissimanersoq takoqqaarusuppaa.

Tunngaviusumik inatsisissaq pillugu Isumalioqatigiissitami sulineq maannamut pivallaarnagu allat oqallisigineqartarsimapput, Vivian Motzfeldt kingusinnerusukkullu Doris J. Jensen siulittaasuusimapput. Qinikkatut ilaasortat aningaasarsiaqartinneqarnerat pingaartumik oqaluuserineqartarsimavoq.

- Aningaasarsiat pineqaratik tunngaviusumik inatsisissaq nutaaq sammineqassaaq, siulittaasunngortussaq katissimalluni qaammatinik arfineq-pingasunik utoqqaassusilimmik ernilik erseqqissaavoq.

Ineqi Kielsen Inatsisartunut kingullermik qinersisoqarmat qinigaanngitsoorpoq, Nuummili Siumumut siunnersortitut taamanili atuussimalluni. Aamma Siumut sinnerlugu Folketingimut qinersisoqarmat sassaraluarpoq, Aki-Mathilda Høegh-Damimilli ajorsartinneqarluni.

- Partii isumaqatigiissuteqarfigalugu partiimi siunnersortitut sulinera ingerlatiinnassavara, Ineqi Kielsen nassuiaavoq, peqatigitillugulu oqaatigalugu, Ilisimatusarfimmi inuussutissarsiornermi aningaasaqarnermik ilisimatusarnera qanoq piffissaqarfigitigissanerlugu takorusuppara, Tunngaviusumimmi inatsisissaq pillugu Isumalioqatigiissitami suinermut atatillugu angaalasoqangaatsiartussaammat.

Suinni Fleischer Johansen Doris J. Jensenimut sinniisussaagaluarpoq, maannali Københavnimi najugaqarpoq Aki-Mathilda Høegh-Dam Folketingimi sullillugu. Kalaallit Nunaannut nuulluni ilaasortaanermi akissarsiat kisiisa akissarsiarissallugit imminut akilersinnaasutut isigisimannginnguatsiarpaa.