22-nik ukiulik ulluni 28-ni tigummigallagassanngortinneqartoq

Angut 22-nik ukiulik pingasunngornerup ullaassaani marlunnik toqutsisimasutut unnerluutigineqarluni ulluni 28-ni tigummigallagassanngortinneqarpoq.

Qeqqata Eqqartuussiviani ippassaq inatsit tunngaviusoq naapertorlugu killisiuisoqareernerani aalajangerneqarpoq angut 22-nik ukiulik ulluni 28-ni tigummigallagassanngortinneqassasoq.

Kalaallit Nunaanni Politiit taama tusagassiutinut nalunaaruteqarput.

Angut marlunnik toqutsisimasutut unnerluutigineqarpoq, pineqartut tassaallutik angut 60-it qiteqqullugit ukiulik aamma arnaq 50-it aallartilaarnerani ukiulik.

Inuit marluk Maniitsumi angerlarsimaffimmi toqungasut politiinit pingasunngornerup ullaassaani siumorneqarput.

- Suliami paasiniaaneq suli ingerlavoq, taamaattumik maannakkumut allanik oqaaseqarsinnaanngilagut, Kalaallit Nunaanni Politiit ilisimatitsipput.

Naalagaaffiup Politiivi Nuummilu politiit ikiuuttut

Maniitsoq Politi Nuummi politiinit suliami ikiorneqarpoq, Naalagaaffiullu Politiivini pinerluttoqarsimatillugu misissuisartut pingasut Maniitsumut ippassaq sisamanngornermi aamma tikillutik.

Naalagaaffimmi Politiinit pinerluttoqarsimatillugu misissuisartut pingasut, Nuummiillu politiit tallimat Maniitsumi Politiit marlunnik toqutsisoqarsimaneranut suliami paasiniaanermi maanna ikiorpaat.

Powered by Labrador CMS