Atuakkat

21-nik ukiulik atuakkiortoq: - Atuakkiortuunerarsinnaalluni nuannepoq

Atuakkiortoq inuusuttoq Apollus Inûsugtoq oqaluttualioqqaatimi saqqummersinneqarneranit qaammatit arlaqanngitsut qaangiunnerini, nutaamik atuakkiussalluni eqqarsaatersuuteqalereersimavoq.

Apollus Inûsugtoq
'Uummataanit isaanut' Apollus Inûsugtup atuakkiaraa

21-nik ukiulik Avannaani nunaqarfimmi Ikerasaarsunninngaanneertoq Apollus Inûsugtoq siullermeerluni atuakkioqqaatini 'Uummataani isaanut' meeqqanut inuusuttunullu oqaluttualiaq saqqummerseqqammerpaa.

- Taamak inuusutsigalunga atuakkamik saqqummersitsinissara sinnattorisimanngisaannarpara, kisianni atuakkiortuunerarsinnaaneq assut nuannerpoq, Apollus Inûsugtoq nuannaangaaqaluni oqaluttuarpoq.

Tuluit atuagaataannik atuartartoq

Atuakkerituujuvorli oqaluttualianillu asanninnilersaarutinillu pissanganartulianik nuannarisalik, sunngiffimmilu allassalluni nuannarisaraa.

- Tuluit atuagaataat toqqagassaqarnerusarmata atuarnerusarpakka, atuakkiortoq inuusuttoq oqarpoq, oqaluttuaraalu qallunaat kalaallillu atuakkiaannik atuartarluni.

Taassuma atuakkanik soqutigisaqalernera siusissukkut titartakkanik nangeqattaartulianinngaanneersut suut pineqartut paasinngikkaluarlugit nuannarisaqarnera aallartissimavoq.

Oqaluttualiaq

- Oqaluttualiat oqaluttuarpalaartut atuarlugit takorluuisitsilersinnaasut atuassallugit nuannaraara, atuakkiortoq inuusuttoq oqarpoq.

Taamaammat aamma nammineq oqaluttuarpalaartumik inuusuttunut meeqqanullu tulluartumik atuakkiorsimavoq 'Uummataani isaanut'.

Atuakkiaani pigaarnertut inuttarineqartoq tassaavoq Tobiarsi, nukappiaraq aqqanilinnik ukiulik, sininneranilu 'Taartup nunaa'nukaanneqartoq. Nunarsuarmilu tassani Holgulu ajortunik sorsoqatigeqqaartinnagu nunarsuarmut piviusumut utersinnaanngitsoq.

Saqqummersitsivimmut sianersimasoq

Taanna oqaluttuarpoq, qaammatini arlalinni atuakkiani ingerlassimallugu, sunngiffianilu allatarisarsimasai atuakkamut katiterneqarsinnaalersimallutik. Atuakkanik qanoq ililluni saqqummersissanerlugu anaanani aperisimavaa.

- Anaanama Maanuup Atuakkiorfia tusarsisimavaa, piginnittuatalu normua pissarsiareriarlugu sianerfigaara. Manuskiptiliara Magnus Larsenimut nassiuppara, nuannarisimangunarlugulu, allanngortitserlugulu kukkunersiorpaa, Apollus Inûsugtok ilaquttaminit tapersersorluarneqarsimasoq, oqaluttuarpoq.

Aamma atuaruk:

Apollus Inûsugtup atuakkiaa, saqqummersitsiveeqqami, Maanuup Atuakkiorfiani pisiarineqarsinnaasoq, massakkut saqqummersinneqaraniit qaammatit marluk qaangiunnerini atuakkat 200-t tunineqarsimapput.

Kalaallit atuakkiaanik amerlanerusunik takorusuttoq

Atuakkiortup inuusuttup kissaatigaa inuusuttut atuakkiaannik amerlanerusunik takorusulluni kaammattuutigaalu atuakkiornissamik eqqarsaateqarsimagaanni aallartiinnaqullugit .

- Atuakkiortunillu kalaallit oqaluttualiaannik atuakkanik nutaanik takulluni nuannissangaluarpoq, Apollus Inûsugtoq oqarpoq.

Atuakkamik saqqummerserteqqammersup nutaamik unammillernarnerusumik atuakkialioqqinnissani eqqarsaatigilereersimavaa. Atuagaq asanninnilersaarut arnamik pingaarnertut inuttaqartinneqartoq.

Imminut unammillerfiginiartoq

- Imminut unammilernissara eqqarsaatigisimavara, atuakkamik arnat isiginnittariaasiat atoriaraluassallugu, angut inussuttoq oqarpoq.

Apollus Inûsugtoq Qaqqaannguup Atuarfiani, Ikerarsaarsunni meeqqat atuarfiani 1. klassemiit 9. klassemut atuarsimavoq, 10. klassemilu Aasiaat nunaqarfianeersut atuartut allat assigalugit Gammeqarfimmi Aasianniittumi atuarsimalluni. Meeqqat atuarfiani inaarutaasumik misilitsinnerup kingorna Himmelbjergegnens Natur- og Idrætsefterskolemi Danmarkimiittumi ukioq ataaseq atuarpoq.

21-nik ukiulik atuakkiortoq Ikerasaarsummiu ullumikkut Qasigiannguani najugaqarpoq pisiniarfeeqqamilu sulilluni. Ukioq manna IT-supporteritut ilinniartitaanermut akuerineqarsimangaluarpoq, taamaattoq suliffimmik misiliiffissaminik nassaarsimanngilaq, taamaammallu ilinniakkamik aallartitsisinnaasimanani.

Powered by Labrador CMS