2020 aanaralaarsuaq: Pilluaqqusineq ima isumaqartipparput
Ukiutoqaq naalerpoq, juullimilu pilluaqqusinerit ukiortaami pilluaqqusinermik taarserneqalerput, ilaasalu ’ukiumik pilluarnartumik kissaallusi’ atortarpaat.
Pilluaqqusinerit isumaqartinneqarnerat juullimi tunissutitullu assigiinngisitaartigisinnaapput. Inuit aqqusinermiittut AG’p apersorpai qanoq isumaqartinneraat uku oqaatsit: Ukiortaami pilluarit ukiumillu pilluarnartumik kissaappakkit.
Lars Mikael Egede:
- Uanga qutsattarpakka pilluaqqutittut. Pilluarnermik tunisisutut tamanna tusaasarpara taannalu ataqqisaqaara. Uanga tassa ukioq pilluarnartoq isumaqartippara ukiup ingerlasup qaangiutinnginnerani ukiup tulliuttup kusanartumik nuannersumik imaqarumaarnera pillugu kissaassinnertut isumaqartippara.
Isak Møller:
- Uanga anittarpara ukiortaami pilluaqqusillunga, soorlu assersuutigalugu massakkut 2019 naammat 2020 pilluarnartuujumaartoq. Imaassinnaagami ukioq 2019-mi pilluarnartoqarsimasoq tamannalu ukiortaami attatiinnarumallugu.
Hans Peter Kleemann:
- Inoqatinnguakka ukioq ilivitsoq tulliuttoq ajunnginnerpaarpaamik kissaallugit. Taamatut oqartarneq akeqanngitsunnguannguummat atorluartariaqartaratsigu. Kisianni aamma ukiortaami pilluaqqusigaangatta ulloq taanna pilluaqqusarpagut sapaassuarnut ilaammat. Kisianni taanna aappaatigut ukioq ilivitsuusinnaavoq: Ukiup tullia ajunngitsunnguugina, sissuerlutit, ilinnullu paaralutit. Taavalu taamatut kissaassilluta oqaraangatta inuk eqqarsarfissittarparput: inuuneratoruna pitsaanerusup tungaanut qanoq ilillunga ingerlateriaralualaarlara. Arlallit pujortassaartarput nalunaaquttap akunneri marluinnannguugaluartut ilaasalu iluatsittarlugu. Tassa kissaassineq ajunngitsumik. Aamma nalusagut pilluaqqugaangatsigit ilimanarpoq pilluaqqutittup qujamasuutigalugu tigulluartaraa.
Ina Mathiasen:
- Imatut eqqarsaatigisinnaavara ukiortaami pilluarit ilisarisimasaq imaluunniit ilisarisimanngikkaluarlugu saneqqullugu oqarfigipallallugu ukiortaami pilluarit. Taava »ukiumik pilluarnartumik kissaappakkit« soorlu piffissaqarfiginerullugu uummamminngaanneerpalunnerusumik pilluaqqusineq.
Aviaq T. Lyberth:
- Taanna anikkaangakku isumaqartittarpara ukiumi nutaami ajunngitsunik tamanik kissaassillunga. Taamatullu oqaraangama aamma ukiumut qaangiutilersumut qujallunga oqaaseq taanna anittarpara ukiup ataatsip ingerlanerani pisorpassuaqartarmat ajunnginnerpaanik kissaassisarpunga. Ukiup ingerlanerani ilaannikkut annaasaqartarpugut ilaatigullu nuannersunik pisoqartarluni. Soorlu ukioq kingulleq ukiortaami pilluaqqutikkaangatta eqqarsartarpugut tassa ernertaartussaalluta. Ajunngitsussanik kissaassisarpunga nalugatsigu qanoq pisoqarumaarnersoq.
Tukummeq Qaavigaq:
- Kalaallisut oqaaserput taanna peqarnermut pissarsilluarnermut tunngavoq. Tassa ajorsarnermut akerliulluni, qanga inuit ajorsartarallarmata. Taava kissaassilluartarput peqarluarnissaannik, pilluarnissaannillu. Taamatut isumaqartippara. Pilluarneq isumaqartittarpara peqarluarluni, pissaqarluarluni inuussutissaqarlunilu. Soorlu oqaaseq pivoq, taava peqarpoq aamma pilluarpoq – tassa pissaaleqinngilaq.
AG-p juullimi ukiortaamilu aviisiani allaaserisanik allanik aamma atuarsinnaavutit. Aviisi uani ataani pissarsiarisinnaavat:
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...
