2019-imi toqukkut qimaguttut
Ukiumi qaangiutilersumi ilaatigut erinarsornikkut pingaarutillit arlallit toqupput.
Ida Heinrich
2019 alianartumik aallartippoq. Ida Heinrich (in. 1979) februaarip qiteqqunnerani kræftimik napparsimalluni toquvoq. 39-nik ukioqalerpoq. Meeqqani marluk qimatarai.
Toqunissani sioqqutitsiarlugu Igloo Magazinemit apersorneqarpoq. Oqaloqatigiinnermi tassani uppernarsarneqarluni piumassuseqarnera aamma meeqqaminut qaniginerpaasaminullu asanninnera. Oqariartuutai kingulliit ilaatigut makkuupput, Igloo Magazinemi atuarneqarsinnaasut:
- Inuuneq nuannaarutigiuk. Nikallungaannaraluarutta sanngiinnerulissaagut. Asanninneq tamanit pingaarnersaavoq. Inuit tamaasa assigiimmik pisarniarsigik. Inunnik immikkoortitsisarani. Ingutsisoqartaqinani. Nuannaarneq kissalaarnerlu misigisinnaassavavut ilakkuminartuullutalu. Immitsinnut paaraluta, qanilaarneq asanninnerlu. Meeqqat asanninnermik ilinniartitsillaqqinnersaapput, naak tamanna namminneq nalugaluarlugu.
Ida Heinrichip toqukkut qimagutiaarnera tusarliunneqarmat, eqqaaniaalluni oqaatsinik kusanartunik nutaarsiassaqartitsivinnut takkussuuttoqarluarpoq.
Anda Kuitse
Qilaatersortartoq ilisimaneqartoq septembarimi arfininngornikkut toqukkut qimaguppoq. Taanna Kulusummi 1951-imi inunngorpoq qilaatersortartut Milka aamma Vilhelm Kuitse angajoqqaaralugit. Anda Kuitse ileqqutoqqamik sivisuumik kingornuttagaasimasumik ingerlatitseqqittuuvoq. Qilaatersuutit angumminit ilinniarpai, taakkulu angutaata aamma angumminit ilinniarsimallugit. Naalakkersuisut eqqaaniaallutik allapput, “Anda Kuitsep inngerutitoqqanik Nunatta kangianeersunik ingerlatitseqqittutut tammatsaaliuisutullu annertuumik suliaqarsimanini eqqaamaneqaatigissagaa”.
Stephen Heilmann
Radiormiu ilisimaneqarluartoq Stephen Heilmann juunimi toquvoq. Taanna tusagassiuinermut tunngasumik siullermeerluni 1967-imi suliaqalerpoq KNR-imilu pisortatut atorfeqarsimalluni. Politikimik aamma soqutigisaqarluartuuvoq. Ukiuni sisamani (1983-imit 1987-imut) kulturimut, ilageeqarnermut atuartitaanermullu naalakkersuisuuvoq.
- Namminersornerullutik Oqartussat nersornaasiuttagaat sølviusoq 2007-imi tunniunneqartussanngormat, kalaallit kulturikkut inuunerannut pingaaruteqarnerujussuani pissutigalugit saqqarmiulerneqartoq, Naalakkersuisut eqqaaniaallutik allapput.
Emilie Lennert
Sisimiormiu ilungersuussilluartoq ataqqinaammillu innuttaasoq 87-inik ukioqarluni maajimi toquvoq. Emilie Lennert ukiut 50-it sinnerlugit inuiaqatigiinnik sullissisimavoq aamma arnat kommunalbestyrelsimut qinigaasartut siulliit ilagisimallugit, 1967-imi qinigaagami.
1975-imi borgmesterinngorpoq. Kommunalbestyrelsimut ukiuni katillugit 34-ni ilaasortaavoq, taakkunannga ukiut aqqaneq-marluk siulittaasuullunilu borgmesteriulluni. Tamatuma saniatigut aamma Inatsisartuni ukiuni arlalissuarni ilaasortaavoq (1984-imit 95-imut).
- Emiliep sivisunerpaamik suliatigut tunniusimaffiginerpaasimasaa tassaavoq najukkami politikkikkut sulineq kommunimilu ineriartortitsineq. Sisimiut ullutsinni illoqarfittut ingerlalluartutut, pisoqarfiusutut eqeersimaarfiusutullu ilisimaneqarneranut annertuumik ataqqineqaatigigaa, Qeqqata Kommuniani maanna borgmesteriusoq Malik Berthelsen eqqaaniaalluni allappoq.
Larserâq Skifte
Lârsêraq Skifte nakkarluni ajutoornermigut apriilimi ajunaarpoq.
- Tamanna upperiuminaaqaaq, Svend Hardenberg eqqaaniaalluni allappoq imalu ilassuteqarluni:
- Arlallit Larsêraq inuttut kialaartutut ilisimavaat – sulerusussuseqartutut ilisimaneqarpoq, anguniagalik takorluuisinnaassuseqartoq, amerlasuunillu sunniisimalluni isumassarsititsisarsimavoq. Oqaasiinnaat atorlugit Larsêraq nassuiaruminaappoq, najukkani inuiaqatigiillu, qiimasuunerminik sunnersimasaramigit, kulturimik suliaqarnikkut aammali timersornerup silarsuaani. Sisimiut aamma Kalaallit Nunaat Lârsêraqaratik allaanerujussuussapput, Svend Hardenberg allappoq.
Lârsêraq Skifte 67-inik ukioqarluni toquvoq.
Peder Munk Pedersen
Atuuffigisimasai amerlaqaat. AG-mi aviisiliortutut aallartippoq kingusinnerusukkullu Sermitsiami aaqqissuisunngorluni. Tamatuma kingorna aalisarnermik inuussutissarsiuteqarnermik sammisaqalerpoq kilisaataatillillu peqatigiiffianni APK-mi pisortanngorluni kingusinnerusukkullu aalisarnermut pisortaqarfimmi pisortanngorluni. Toqunissani sioqqutitsiarlugu Polar Seafoodip iniutaanni Aalborgimiittuni, Inatsisartut siulittaasuannit Vivian Motzfeldtimit Nersornaammik sølviusumik saqqarmiulerneqarpoq.
AG-p juullimut ukiortaamullu aviisiliaani allaaserisanik atuarnerusinnaavutit: