KL

DK

2019-imi pinerlunnerit: Nalunaarutiginninnerit amerleriaqqipput

Politiinut nalunaarutiginninnerit ukioq manna siornarnit amerlanerupput. Tamannali aamma ajunngitsumik annertunerusumik sianiginnilernermut takussutissaasinnaavoq: Assersuutigalugu nukappiaqqat siusinnerusumit amerlanerusut kinguaassiutitigut atornerlunneqarsimasut nalunaarutigisalerpaat, politiit qullersaat AG-mit apersorneqarlutik oqarput.

Chefpolitiinspektør Svend Foldager, unnerluussisussaatitaaneq Morten Nielsen politimesterilu Bjørn Tegner Bay ukioq 2019 kingumut qiviarpaat, ukioq mannalu pinerluttulerinermik inatsimmik unioqqutitsinerit manna tikillugu siornarnit amerlanerpaasimapput.
Inge S. Rasmussen

Obs. Allaaserisaq 17. december 2019-iminngaanneersuuvoq. Ukiumi 2019-imi toqutsinerit qassiunerinik chefpolitiinspektør Svend Foldagerip oqaaseqarnera, allaaserisap suliarineqareernerani allanngorpoq, aaqq.

Siorna pinerlunnernik nalunaarutiginninnerit oqaluttuarisaanermi aatsaat taama ikitsigisut ukioq manna nallerneqarunanngillat. Kalaallit Nunaanni Politiinit kisitsisit naapertorlugit pinerluttulerinermi inatsimmik unioqqutitsinermik nalunaarutiginninnerit decembarip aallartinnerani 2018-imi ukioq naallugu nalunaarutigineqartunit 400-nik amerlanerulereersimapput, siorna nalunaarutiginninnerit 3.449-uusimallutik.

- Ukiuni kingullerni 10-15-ini pinerlunnerit ikiliartorsimagaluarlutik amerliartoqqilersimagunarput. Amerleriapiluunngillat, amerleriarpulli, politimester Bjørn Bay paasissutissiivoq, kisitsisilli nangaanartoqartippai, pissutigalugu politiit ukiumoortumik kisitsisitigut takussutissiaannut atatillugu pisarnertut sukumiinerusumik misissuinerit suli ingerlanneqarsimanngimmata.

Pinerlunnerilli amerleriarnerannut nassuiaatissaq tassaasinnaavoq politiit nalunaarutiginninnernik nutaamik nalunaarsueriaaseqalersimammata, taamatut naliliivoq chefpolitiinspektør Svend Foldager.

- Isumaqarpunga ilaatigut periutsip allanngortinneqarnera sunniuteqartoq. Sulianik nalunaarsuinermut nukiit amerlanerusut atulersimavagut, taanna oqarpoq.

Politiilli kisitsisitigut takusassiaanni immikkoortut ilaanni kisitsisit ukiut tamaviisa assigiipajaaginnartarput.

Assersuutigalugu ilimanarpoq 2019-imuttaaq takussutissaassasoq imminut toquttut amerlanerujussuat. Sapaatip akunnerata siuliani ataasinngornermi AG-p politiit qullersaat apersormagu imminut toqussimasut 41-uupput.

2018-imi imminut toqussimasutut nalunaarsorneqarsimasut katillugit 43-uupput, unnerluussisussaatitaaneq Morten Nielsen paasissutissiivoq.

Video atorlugu apersuinerit amerlanerit

Politiinit isigalugu pinerluttulerinermik inatsimmik unioqqutitsinernik amerlanerusut nalunaarutiginnittarnerat ajortuunngilaq, Bjørn T. Bay tikkuaavoq.

Tamannami atassuteqarsinnaavoq politiit meeqqanik kinguaassiutitigut atornerluisarnermik samminninnerulersimanerannut.

- Tassanilu kisitsisit ukioq manna aamma siornarnit amerlanerussapput. Imaanngilaq tamanna isumaqartoq atornerluinerit amerleriarsimanerannik, amerlanerilli nalunaarutiginnittalernerat takussutissaavoq paqumigisaq kigaatsumik qaangeriartorneqartoq, politimesteri oqarpoq.

Paqumigisat qaangerneqarnerannut takussutissaasinnaasoq tassaavoq nukappiaqqat, kinguaassiutitigut atornerlunneqarnermik nalunaarutiginnittut amerlanerulersimanerat, chefpolitiinspektørilu Svend Foldager isumaqarpoq tamatumunnga pissutaasoq paasisitsiniaaneq Killiliisa. Paasisitsiniaanerup ilarujussua tassaavoq kinguaassiutitigut atornerlunneqarsimasut maligassiuisussatut toqqakkat, sassartarlutik oqaluttuassartaminnik oqaluttuartittarnerat.

- Isumaqarluinnarpunga maligassiuisut sassartarnerat assigiinngisitsisoq. Tassuunakkut takutinneqarpoq kinguaassiutitigut atornerlunneqarneq oqaluttuarissallugu ajunngitsoq, aamma nukappiaraalluni, Svend Foldager oqarpoq.

Taassuma tikkuarpaa ammanerulernerup kingunerigaa nalunaarutiginninnerit amerlanerulernerat, taamaasillunilu aamma video atorlugu meeqqanik apersuinerit siusinnerusumit amerlanerulerlutik: 2019-imi novembarip 29-anni politiit video atorlugu 142-riarlutik apersuisimapput, taakkulu siorna taamaasineranut sanilliullugit amerlanerujussuupput, taamani video atorlugu meeqqanik apersuinerit 98-iusimammata.

- Tamatumunngalu pissutaaqataavoq pisut amerlanerusut nalunaarutigineqartalernerat, Svend Foldager aamma Bjørn T. Bay oqarput.

Atornerluinermut telefoni

Kommunefogedit, politiinngorniat politiillu angallataat

Iluminni pisutigut ukioq pitsaasuulluarsimammat politiit qullersaasa nuannaarutigaat.

Kommunefogedit amerlanerulersimapput, taamaasilluni nunami tamarmi kommunefogedit nutaat qulingiluat atorfinitsinneqarsimallutik. Inatsisinik atortitsinermut ministereqarfiup agguagassarititai atorlugit politiit nunami angalasimapput atorfinnullu pingaarutilinnut, politikkikkut sammineqartorujussuarnut, inunnik ilinniagaqartitsillutik.

- Maanna takussaanerujussuanngorpugut, sulisitsisutullu pitsaanerusumik isumagisalerpagut, politimester Bjørn Bay oqarpoq, paasissutissiivorlu kommunefogedit ilaatigut uniformeqassasut, vesteqarlutik kiisalu perberspraymik atortoqarlutik. Siunissami aamma vagtradiomik peqalissapput, toortagaq ataasiinnaq toorlugu vagtcentrali attaveqarfigisinnaalerlugu. Tamanna ullumikkumut sanilliullugu pitsanngoriarnerujussuussaaq, ullumikkut kommunefogedit pinartumik pisoqassagaluarpat taamaallaat mobiltelefoni atorsinnaagamikku.

Politiinngorniat amerlassusiat eqqarsaatigalugu massakkorpiaq politiinngorniartut arfineq-marluupput. Amerlanerunissaat kissaatiginartikkaluarlugu politimesterip tamanna naammagisimaarpaa.

- Kalaallit Nunaat politeeqarfiuvoq ataaseq, Danmarkimi politeeqarfiit assigalugit, innuttaasullu amerlassusiat eqqarsaatigalugu Næstvedimi innuttaasutut amerlatigimmata politiinngorniat arfineq-marluk ajunngilluinnarput, Bjørn T. Bay tunngavilersuivoq.

Ukiuni tulliuttuni politiit angallataannit sisamaasunit pingasut angallatinik sukkasuulianik taarserneqassapput, politiillu piareersarnerminni ima siuarsimatigilersimapput naatsorsuutigalugu suliassaq aappaagu kvartalimi siullermi EU-mi pilersuisunut suliarinnittussarsiuukkumaarlugu.

- Maanna angallativut pissarsinikiffigivallaartaqaagut. Taamaattumik angallatit nutaat atorlugit annertunerujussuamik angalasalissaagut, chefpolitiinspektør Svend Foldager naliliivoq.

Angallatit nutaat aningaasartaat suli ilisimaneqanngikkaluartoq politiit qullersaasa tunuartilluinnarpaat angallatit taarserneqarnerat aningaasanik sipaarniuteqarnermik pissuteqartoq, soorlu politikerit ilaat taama oqarsimasut.

- Sipaarniuteqarnissaq pissutaanngilaq, Bjørn T. Bay erseqqissaavoq, ilanngullugulu oqaatigaa sipaarniuteqartoqassagaluarpat sipaarniutit pinngitsoorani politiinut tuttussaasut, angallatillu taarsernissaat suliassanik pissuteqartoq, ilanngullugu SAR-imik annaassiniarnermi nunaqarfinnilu pinartumik pisoqartillugu sukkasuumik anngussinnaanissaq.

Meeqqanik kinguaassiutitigut atornerluinermik nalunaarutiginninnerit pingajorarterutaasa missaannaanniittut eqqartuussivinni eqqartuussinermik kinguneqartarput.

Tamannali kisimi aalajangiisuunngilaq, Bjørn T. Bay tikkuaavoq.

- Aamma pingaaruteqartorujussuuvoq inuit, aamma meeqqat, tusarneqarlutillu takuneqarnissaat. Inuk kinguaassiutitigut atornerlunneqarsimasutut misigisimaguni ikiorneqarnissaminik pisariaqartitsivoq. Ikiorneqarsinnaavorlu pissutsit nalunaarutigineqarpata, taanna oqarpoq.

Aamma inunnut meeqqanik sullissisunut (soorlu nakorsanut, ilinniartitsisunut, socialrådgiverinut) ikiortissaqarpoq, meeqqamik kinguaassiutitigut atornerlunneqarsimasumik pasitsakkunik iliuuseqassanerlutik politiillu akulerutissanerlugit nalornisunut.

Taamaattoqartillugu atornerluinermut telefonimik taaneqartoq atorneqarsinnaavoq. Taanna politiit qaammatialunnguit matuma siornatigut pilersissimavaat, ulluinnarnilu arfineq-pingasuniit nal. 16 tungaanut ammasarpoq immikkut ilisimasalinnit ingerlanneqarluni. Tassanngaannit politiit vagtcentraliannut sianertoqarsinnaavoq.

Politiit naapertorlugit atornerluinermut telefoni oktobarimi pilersinneqaramili atorluarneqarsimavoq.

- Ullormut arlalinnik sianertoqartarpoq. Takusinnaavarput oqaloqateqarsinnaaneq pitsaasuusoq, Svend Foldager oqarpoq, tikkuarpaalu nunami tamarmi inuit meeqqanik sammisallit qanoq iliornissaminnik nalornissuteqarnertik kiserliuutigisaqigaat, immaqa aamma pissutigalugu ajortuliorsimasinnaasoq ajortuliorfigineqarsimasinnaasorlu nalunngisarigamikkit.

Toqutsinerit pingasut – manna tikillugu

Inunnik innarliilluni pinerlunnerit, soorlu toqutsinerit persuttaanerillu inuiaqatigiinni suli atugaaqaat.

Manna tikillugu 2019-imi pingasunik toqutsisoqarsimavoq, 2018-imit ataatsimik ikinnerullutik 2017-imillu pingasunik ikinnerullutik. Chefpolitiinspektørilli Svend Foldagerip tikkuarpaa siorna ukiup taamaasinerani toqutsinerit marluusimasut.

Toqutsinerilli sisamanngorput 2018-imi sapaatip akunnerani juullisiorfiusumi, Ilulissani Uummannamilu toqutsisoqarmat.

- Ukioq manna toqutsinerit pingasuinnaasinnaappata tamanna ajussanngilaq. Assigiinnarpaali Danmarkimi 300-nik toqutsisoqarsimassasoq, tappavanili toqutsinerit ukiumut 50-iupput, Svend Foldager oqarpoq.

Politimester Bjørn T. Bayip erseqqissarpaa toqutsisarnerit qanorluunniit amerlatigigaluarpata toqutsineq ataasiinnannguarluunniit suli amerlavallaartoq, nunami Kalaallit Nunaanni taama inukitsigisumi.

- Nalinginnaasumik toqutsisoqarsimasussaanngikkaluarpoq. Ukioq allortarlugu pingasukkaarlugilluunniit toqutsinerit pisalersuuppata tamanna malunnartumik pitsanngoriaataassagaluarpoq, tassa inuiaqatigiit ikittuararsuit kisimik toqutsisoqarneq ajormata. Tamannali angutinnagu immitsinnut oqarfigisinnaanngilagut ajortoqanngitsoq, Bjørn T. Bay oqarpoq.

Perulluliornerit toqqissisimanerlu

Toqutsisarnerit amerlassusaat nunatsinni persuttaasarnerit amerlanerujussuannut attuumassuteqarpoq.

- Toqutsineq tamatigungajak puuallannermik pissuteqartarpoq, politiit qullersaat isumaqatigiillutik oqarput.

Avataanit isigalugu, Kalaallit Nunaannillu ilisimasaqarani, toqutsinermut, nakuusernermut pinngitsaaliinermullu kisitsisitigut takussutissat isumaliulersitsisinnaapput inuiaqatigiit akornanniilluni najugaqarlunilu toqqissisimananngitsorujussuussasoq.

Taamaakkaluartoq Kalaallit Nunaanni najugaqarneq toqqissisimanarpoq, politiit tikkuaapput.

Inunnik innarliilluni pinerlunnerit angerlarsimaffinni pinerusarput, inuit ilisarisimaqatigiit akornanni, tassaanerusarpullu inuit inuttut imaluunniit inooqatigiinnikkut annertuunik ajornartorsiutillit.

- Taamaattumik innuttaasut amerlanersaat aqqusinermi nakuuserfigineqarnissaminnut ersissutissaqanngillat, politimester Bjørn T. Bay oqarpoq.

Taassuma isumaqatigaa ilaanneeriarluni aqqusinermi nakuusertoqartarmat, pingaartumik Nuummi, inuusuttulli angajoqqaavilu ulluinnarni ersissutissaqanngillat, taanna isumaqarpoq.

- Aallaavittut Kalaallit Nunaanni illoqarfimmi sumiiffeqanngilaq arnap inuusuttup kisimiilluni pisuttuarfigisinnaasaanik. Imaalluarsinnaavoq ataataat taamatut isumaqanngitsut, politiinilli isigalugu nunami maani arlaanukarnissaminnut ersissutissaqassallutik tunngavissaqanngillat, Bjørn T. Bay oqarpoq.

Pitsaaliuinermik suliniut

Tamatumunnga atatillugu politimesterip oqaatigaa pinaveersaartitsinermik suliniut »Oqaloqatigiinneq nakuuserneq pinnagu« unitsinneqarsimasoq.

Tamatumunnga atortussaaleqineq pissutaanngilaq, pissutaavorli politiit qularnartoqartissimammassuk suliniutikkut eqqortut anguneqarnersut, aaqqissuussinernut, atuarfinni ingerlanneqarnerusartunut, kikkut takkuttarnerannik misilittakkat tunngavigalugit.

- Aallaavittut Kalaallit Nunaanni nakuuserneq inunni inooqatigiinnikkut annertuunik ajornartorsiutilinni ajornartorsiut annersaraat. Taakkualu takkunneq ajorput, Bjørn T. Bay nassuiaavoq.

Taamaattumik politiit isumaliutigaat suliniut isumaliutigineqaqqissanersoq imaluunniit allamik taarserneqassanersoq.

Meeqqat kinguaassiutitigut atornerlunneqartarnerat akiorniarlugu suliniut alla tassaavoq illoqarfinni anginerusuni arlalinni inunnik pinaveersaartitsinermik sulisunik atorfinitsitsinerit. AG-p maajimi oqaluttuarneratut taamanikkut Nuummi Tasiilamilu pinaveersaartitsisunik atorfinitsitsisoqarsimavoq.

Ullumikkut politiit aamma Ilulissani Qaqortumilu pinerlunnermik pinaveersaartitsisunik atorfinitsitsisimapput. Massakkorpiarlu misissorneqarpoq atorfinitsitsinerit tullii sumi pissanersut.

Suliniut »Oqaloqatigiinneq angerlarsimaffimmi perulluliorneq pinnagu« illoqarfinni suli ingerlanneqarpoq. Tassani politiinit isumaginninnermillu ingerlatsivinnit pingaartumik sammineqarput illumi meerartalinni perulluliornerit.

Hashi aningaasallu

Hashimik eqqussisartut aningaasanillu, qularnanngitsumik hashimik tuniniaanermeersunik, annissisartut isumassarsiullaqqissorujussuupput, tamannalu AG-p atuartartuisa ukiup ingerlanerani eqqartuussivimmit nunattalu eqqartuussivianit allaaserisartakkanit takusarsimavaat.

Ikiaroornartunik pinerlunnermut politiit suli kisitsisitigut takussutissiorsimanngillat, chefpolitiinspektørili Svend Foldager naapertorlugu ilanngaaserisut suleqatigalugit ukiup ingerlanerani »aningaasat amerlangaatsiartut« arsaarinnissutigineqarsimapput.

Unnerluussisussaatitaanerup Morten Nielsenip tikkuarpaa aningaasat suminngaanneersuunersut nalileruminaassinnaasartoq, tassa ilumut ikiaroornartumik tuniniaanermeersuunersut.

Taamaattumik inuit pinerluttulerinermut inatsimmi tillitanik tuniniaanermi paragraffi malillugu eqqartuunneqarajuttarput, eqqartuussiviup takusinnaammagu 19-inik ukiulik, suliffeqanngisaannarsimasoq, inatsisinik unioqqutitsisimanngikkuni 1 million koruuninik tigumiarnavianngitsoq, tassami pokernermeersuunavianngillat, unnerluunneqartoq nammineq taama oqaraluartoq.

Ikiaroornartulerinermik nalunaarutiginninnerit amerlassusaat, qaammatit tallimat matuma siornatigut, juulip 24-anni, naatsorsorneqarnerat naapertorlugu 2019-imi ikiaroornartumik pinerlunnerit ukiuni allanisut annertutigissaaq.

Aamma ikiaroornartut, Kalaallit Nunaannut eqqunneqartartut, suuneri allanngorsimanngillat.

- Suli hashi eqqussorneqarnersaavoq. Qaqutiguinnaq ikiaroornartunik sakkortunerulaartunik annikitsuaqqanik naammattuuisarpugut (lsd, ecstacy imaluunniit kokain, aaqqiss.), qularutiginerli ajorparput tigusarineqartoq oqaraangat nammineq atugassaralugit, tuniniaqqinniarlugit eqqunnagit, Bjørn T. Bay oqarpoq erseqqissaallunilu:

- Hashi suli unammilligassarujussuuvoq.

AG-p juullimut ukiortaamullu aviisiliaa 80-inik qupperneqartoq pissarsiarigukku atuarnerusinnaavutit. Aviisi uani ataani pissarsiarisinnaavat:

inuiagatigiit politiit
Powered by Labrador CMS