2018-imi SAR-imik ujaasinerit ikinnerujussuit

Maannamut 2018-imi SAR-imik ujaasinerit ukiup siulianut sanilliullugit ikinnerullutillu iluatsittut amerlanerupput.

Assimmi umiarsuaq alapernaarsuut Thetis takuneqarsinnaavoq.

Issittumi Sakkutooqarfik 2018-imi 73-eriarluni SAR-imik taaneqartartunik annaassiniaalluni ujaasiartortarsimavoq. Taamaalilluni ukioq manna ukiup siulianut sanilliullugu ujaasinerit ikinneruniarpasipput, Issittumi Sakkutooqarfik siorna 93-eriarluni ujaasiartorsimavoq.

Issittumi Sakkutooqarfik Sermitsiaq.AG-mut taama ilisimatitsivoq.

Iluatsittarnerat qaffariartoq

Ippassaanikkunni aappariinnik ernerannillu ataatsimik ukiulimmik ujaasineq taamaatiinnarneqartariaqarsimavoq, taakku Aasiannit Niaqornaarsummut aallarnerminnit periarfeerupput.

Ujaasinermik ujaarineqartut nassaaritinnagit ujaasinermik taamaatitsinermik aalajangerneq, ukioq manna pingasoriaannarluni pisimasoq paasinarsivoq.

Issittumi Sakkutooqarfiup siorna SAR-imik annaassiniaaneri 93-iupput, taakkunannga arfineq-pingasoriarluni ujaasineq kinguneqanngitsumik taamaatinneqartariaqarsimavoq.

Peqataasorpassuit

SAR-imik annaassiniaalluni ujaasinerit arlalissuit suleqatigiinnerisigut pisarput, taakkunani politiit, Air Greenland aamma Aasiaat Radio ajornartorsiortut aamma annaassiniaasuk akornanni paasissutissiisartut ilaallutik.

Timmisartut, umiarsuit qulimiguullit aamma attaveqarnermut atortorpassuit SAR-imik annaassiniianermi atorneqartarput, inuit ajutoorsimasut nassaariniarlugit, nunakkuuppat, imaaniuppat imaluunniit silaannarmiuppat.

Innuttaasut kajumissutsiminnik ujaaseqataatinneqarsinnaasarput, tamanna aamma aappariit erneratalu ujaarineqarneranni pivoq.

Powered by Labrador CMS