Qaasuitsup Kommunia

2016-imut missingersuut: Qeqertarsuarmi majuartaat paaqqinnittarfinnilu akiliutit appasinerusut

Avannaata kommuniani Qaasuitsumi kommunalbestyrelsip aappaagumut missingersuut, aningaasanik atugassaqarfiunerusoq, isumaqatigiissutigaa

Qaasuitsup Kommunia Qeqertarsuarmi amuartaammik sananissamut akissaqalerpoq. Aanna Uunartuarsuup qaqqaanit isikkivik

Qaasuitsup Kommuniani aningaasaqarniarnikkut kinguariartornerugaluaq Kommune Kujallertulli ilorraap tungaanut saassimavoq.

Qaasuitsumi kommunalbestyrelsip isumaqatigiissup 2016-imut missingersuut 57 millioner koruuninik aningaasartalik akuersissutigaa, kommuni tallimanngormat tusagassiorfinnut nalunaarutikkut paasissutissiivoq.

Ilulissani rådhusimit aningaasaqarnerup pitsanngoriarsimaneranut nassuiaatigineqarput aalisarnikkut tunisat amerlanerulersimanerat pissutigalugu akileraarutitigut isertitat amerleriarsimanerat, kommunip sipaarniuteqarsimanera, aammattaarli kommunini naligiissaarinermik aaqqissuussinikkut kommunip aningaasanik pisariaqartitaminik pissarsisimanera.

Aappaagumut missingersuut nuannaarutigaa

Kommunimi politikerit ilaatigut aalajangiuppaat kommunimi paaqqinnittarfimmut akiliutit appartinnissaannut 3,2 millioner koruunit atorneqassasut, taavalu aamma Qeqertarsuarmi sisorartartunut majuartaammik 600.000 koruunilimmik sanasoqassasoq.

Borgmester Ole Dorphip (S) aappaagumut missingersuut nuannaarutigaa.

– Isumalluarpunga upperalugulu Qaasuitsup Kommuniata aningaasaqarnikkut ineriartornini ilorraap tungaanut aallartissinnaagaa, nunatsinni aningaasaqarnermi pingaarutilittut inissisimaannarnissaanut, tusagassiorfinnut nalunaarutikkut tulluusimaarpasissumik allassimavoq.

Kommuni toqqissisimaneq

Angusalli pisaasut namminneq takkunneq ajorput, borgmesteri Siumumeersoq oqarpoq.

– Kommunip aningaasaatini suli paarilluassavai eqqarsaatigilluassallugulu inuussutissarsiornerup ineriartornerata siuarsarnissaanut aningaasat sumut atorneqassanersut.

Piffissarli qaninnerusoq isigalugu aningaasaqarnikkut pissutsit toqqissisimanarnerulersimapput, taamaattumillu kommunalbestyrelsi aalajangersimavoq Grønlandsbankimi kassekreditimi 5 millioner koruuninik appartinniarlugit.

Kommunip namminersorlutik oqartussat isumaqatigiissuteqarfigisimavai kommunip Grønlandsbankimi kassekreditiata sinnera ukiuni tulliuttuni marlussunni ukiumut 15 millioner koruuninik ikilisarneqassasut.

Sanaartornermut atugassat amerlanerusut

Sanaartornermut missingersuutit 80 millioner koruuninut amerlineqarnissaat kommunip akissaqartilersimavaa, rådhusimilu allattoqarfik naapertorlugu tamakkua ilaatigut atorneqassapput Aasianni Ilulissanilu paaqqinnittarfiliornermut atortullu aserfallassimasut taarsersorneqarnissaannut.

Aamma aappaagu 1 million koruunit atorneqassapput 'aalisarfinni immap naqqata minguitsuutinnissaanut´, 1 million koruunillu atorneqassallutik nunaqarfiit ingerlanneqarnerannut.

Tamatuma saniatigut Ole Dorphip tallimanngormat tusagassiorfinnut nalunaarutikkut oqaatigaa aningaasanik immikkoortitsisoqarsimasoq akileraarutinut procentip maanna atuuttup attatiinnarnissaanut.

Powered by Labrador CMS