2016-imi AWG-qarnissami maskotti qanoq ateqassava?

Nuummi Arctic Winter Gameseqassaaq ukiut marluk missaat qaangiuppata, sukuutsertut kisimik Iqalunni ingerlanneqassallutik.

Arctic Winter Gameseqarnissaanut pilersaarusiortut unammisitseqqipput.

2013-imi decembarimi nunarput tamakkerlugu 4. Klassini atuartut titartaaqqullugit siunnerssuutissamik unammisinneqarput, aamma taamanikkut AWG-qarnissami maskottissap suusinnaaneranik siunnersuuterpassuit takkussuussimapput.

Tassa aamma unammisitsinermi ajugaatinneqartoq toqqarneqarsimalereerpoq, tassaallunilu Paamiuninngaaneersup Stella Josefsenip titartarsimasaa, puisinnguaq. Taanna Stellap assammik titartagaa, uumasunik assigisaanillu inuttut pissusilersortunik titartaallaqqissut ilaata, Christian Rexip, takujuminarsaannarlugu, atuutilivikkuni isikkussaatut titartaqqissimavaa.

- Sineriammit siunnersuuterpassuarnut nuannersunut kusanartunullu tamanut qujangaarpugut, minnerunngitsumik Paamiormiuaqqanut 4. klassimi atuartunut ajugaasimasunut, 3000 kr.-inillu atuaqatigiittut nuannisaqatigiinnissaannut tunineqarsimasunut. Tassalu maanna pissanngatigalugu utaqqisussanngorparput taassumap maskottissatta, qanoq ateqarnissaanik siunnersuutaajumaartussat, AWG2016-imi pisortaq Maliina Abelsen oqarpoq.

Maskottissap atissaa toqqarneqareersimasussaavoq AWG2016-ip tamanut saqqummiunneqannginnerani, Katuami apriilip 25-ani 2014 pisussami, ulloq taanna ilaatigut suaarutigineqassaaq unammisitsinermi ajugaasup aqqa.

Ajugaasup pissarsiariumaarpaa Air Greenlandip iluasaarutaa (gavekorti) arlaannut angalanissamut atorneqartussaq 5000 kr-inik nalilik.

Unammisitsineq naatsumik uteqqillugu:

• Kikkulluunniit unammeqataasinnaapput.
• Kingusinnerpaamik Apriilip 24-ani siunnersuutit uunga nassiutereersimassapput: awg2016@awg2016.gl .
• Siunnersuummik nassiussinermi ateq attavissarlu nalunaarutigineqassapput.
• Ajugaasoq toqqarneqarumaarpoq, tallimanngornermilu apriilip 25-ani avammut nalunaarutigineqassalluni.

Assit ataani takukkit