akileraarutit

2013-imut akileraarutit sippuutaannit utertoorutissat akiligassiinerillu

i Akileraartarnermut Aqutsisoqarfiup ukiumut akileraarfiusumut 2013-imut akileraarutit sippuutaannit utertoorutissat 149,1 mio. koruunit inunnut 22.834-nut utertissavai

149,1 mio. koruuninit ilanngaassinikkut, pisinnaatitaaffimmik tigusisoqarneratigut akiliisitsinikkut kiisalu pigisanik qularnaveeqqutitut sillimmasiinikkut 41,2 mio. koruunit (utertoorutissat tamarmiusut 28 %-iisa missaat) pisortanut akiligassanut kinguaattoorutinut matusissutigalugit akilersinneqarput.

25 mio. koruunit Kalaallit Nunaanni kommuninut, inissiaatileqatigiiffinnut Inimut Iseritsimullu aammalu Nukissiorfinnut il.il. akiitsunut matusissutitut akilersinneqarput, sinneruttut 16,2 mio. koruunit Kalaallit Nunaanni Namminersorlutik Oqartussanut akiligassanut kinguaattoorutinut matusissutigineqarput.

Akileraartartup akileraarutit sippuutaannit utertoorutissai pisortanut akiligassanut kinguaattoorutinut tamakkiisumik ilaannakuusumilluunniit atorneqarsimatillugit, tamanna pillugu immikkut ilisima-titsissummik nalunaarfigineqarput.

Upernaaq 2014 Akileraartarnermut Aqutsisoqarfiup akileraarutit sippuutaannit § 15 naapertorlugu ukiumut akileraarfiusumut 2013-imut utertoorutissat 22,2 mio. koruunit inunnut 1.591-inut utertippai.

22,2 mio. koruuninit ilanngaassinikkut, pisinnaatitaaffimmik tigusisoqarneratigut akiliisitsinikkut kiisalu pigisanik qularnaveeqqutitut sillimmasiinikkut 3,3 mio. koruunit (utertoorutissat tamarmiusut 15 %-iisa missaat) pisortanut akiligassanut kinguaattoorutinut matusissutigalugit akilersinneqarput. 2 mio. koruunit Kalaallit Nunaanni kommuninut, inissiaatileqatigiiffinnut Inimut Iseritsimullu aammalu Nukissiorfinnut il. il. akiitsunut matusissutitut akilersinneqarput, sinneruttut 1,3 mio. koruunit Kalaallit Nunaanni Namminersorlutik Oqartussanut akiligassanut kingu-aattoorutinut matusisutigineqarput.

Matumunnga peqatigitillugu 2013-imut akileraarutissat sinnerinut akiligassat 163,4 mio. koruunit akileraartartunit 9.525-init akileqquneqassapput, taakkunannga 49,1 mio. koruunit 2015-imut siu-moortumik nalunaarsuinermut atatillugu ilanngunneqassapput, 114,3 mio. koruunilli pingasun-ngorlugit avillugit akiligassanngussallutik ulluni 01/09, 01/10 aamma 01/11-2014-imi, kingusinnerpaamillu akilerneqareersimassallutik qaammatit akiligassanngorfimmik ulluisa 20-anni.

Akileraarutissat sinnerinut akiligassat 2015-imut siumoortumik nalunaarsuinermut ilanngussassat akilerneqarsinnaapput ulloq 20. november 2014 nallertinnagu, taamalu tapiliussassaq 6%-iusoq pinngitsoorneqarsinnaalluni.

Tamaaliorsinnaaneq pillugu paasissutissat inaarummik naatsorsuummi takuneqarsinnaapput.

Powered by Labrador CMS