2. april: Siulersuisuni soraarsitsiortorneq
Visit Greenlandimiinnaanngitsoq siulersuisunut ilaasortat pingasut tunuartitaapput. Naalakkersuisut inissiaatileqatigiiffiup Illuut A/S-ip siulersuisuini aamma soraarsitsiortorput
Kalaallit Airportsimi siulersuisut ukioq ataaseq sinnerlugu matuma siorna taamani pisortaq Steffen Ulrich-Lynge tunuartippaat soraarneranullu atatillugu isumaqatigiissusiorfigalugu.
Maanna Steffen Ulrich-Lynge utertinneqarpoq, Naalakkersuisunit saammaanneqarluni.
Namminersorlutik Oqartussat inissiaatileqatigiiffianni Illuut A/S-imi apriilip 2-ani immikkut ittumik ataatsimeersuartoqarnerani Steffen Ulrich-Lynge siulittaasunngortinneqarpoq. Immikkut ittumik ataatsimeersuarneq nalinginnaasumik ataatsimeersuarnerup ingerlanneqarnissaa ullunik 14-iinnarnik sioqqullugu ingerlanneqarpoq.
Tamatuma peqatigisaanik Nikolaj Ezekiassen aamma Finn Olesen siulersuisunut ilaasortatut nutaatut toqqarneqarput. Taakkua sanasutut ilinniagaqarsimasuupput namminerisaminnnillu suliffeqarfiuteqarlutik, tusagassiuutitigut nalunaarummi ilisimatitsissutigineqarpoq.
Siulersuisunut ilaasortat nutaat pingasut inissaqartinniarlugit ingerlatseqatigiiffimmi Nuummi pingaartumik Namminersorlutik Oqartussani sulisunut inissiatut atorneqarnerusunik 750-it missaannik inissiaateqartumi Klaus Jukku Mølgaard, Birte Flæng-Møller aamma Inge Bisgaard tunuartinneqarput.
Eqqartuussissuserisumut ulloq ulapaarfiusoq
Namminersorlutik Oqartussat eqqartuussissuserisuat allaffimmi ataatsimeersuarnertut taaneqartunik isumaginnittoq, aamma allamik suliassaqarsimavoq: Visit Greenlandimi siulersuisunut ilaasortanik pingasunik taarsiineq, siulittaasup Maliina Abelsenip uissuumminangaatsiaqisumik tunuartinneqarfigisaa.
Namminersorlutik Oqartussat ingerlatseqatigiiffiutaanni siulittaasuusimasut siulersuisunullu ilaasortaasimasut sooq tunuartinneqarnersut tusagassiuutinut nalunaarutini oqaatigineqanngilaq. Aamma immikkut ittumik ataatsimeersuarnissat sooq taama nukinginnartigisimanersut taamaalillutik nalunarput.