Tasiilaq

17-nik ukiulik najukkami ataatsimiisitaliamut qinigaasoq

Tasiilami najukkami ataatsimiisitaliamut qinersinermi 17-nik ukiulik innuttaasunik illoqarfiup katersortarfiani ataatsimiisitsisoqarnerani ingerlanneqartumi qinigaavoq

Tunumi illoqarfiit pingaarnersat Tasiilaq

Tasiilami innuttaasut, Paamiormiut soorlu taamaaliornerattut, marlunngornermi unnukkut illoqarfiup najukkami ataatsimiisitaliaani ilaasortassanik qinersiartorput. Qinersinermi tassani 17-niinnarnik ukiulik allanik sisamanik peqateqarluni ataatsimiisitaliami ilaasortanngorpoq.

Taama Kommuneqarfik Sermersooq nittartakkamini allappoq.

Pineqartoq tassaavoq 17-inik ukiulik Pia Gry Christensen, taanna qinerneqarpoq inuusuttut 16-ileereersimasut qineqqusaarsinnaatitaanerannut qinersisinnaatitaanerannullu periarfissaq atorlugu.

Tasiilami qinerneqartut tassaapput:

  • Ole Nuko
  • Dilare Ertaq
  • Pia Gry Christensen
  • Knud Mathiassen
  • Lasarus Mikaelsen

Assit takukkit: Nunatsinni najukkami ataatsimiisitaliaq siullerpaaq

Innuttaasut soqutiginnilluartut
Kommuneqarfik Sermersuup paasissutissiinera najoqqutaralugu nunatsinni najukkani ataatsimiisitalianut qinersinerit siullersaat, Paamiuni Tasiilamilu ingerlanneqartut, innuttaasunit soqutigineqarluarsimapput.

- Kommunerujussuatta ataqatigiissinnissaa anguniarlugu sulerulussimavugut, najukkamilu ataatsimiititaliat illoqarfiit tamarmik tusaaneqarnissaat isumagissavaat. Taamaattumik qinigaarlaat suleqatiginissaannut qilanaarpunga, borgmesteri Asii Chemnitz Narup, Inuit Ataqatigiinnersoq, taama oqarpoq

Kommuneqarfik Sermersooq nunatsinni kommunini siullersaalluni najukkani ataatsimiisitalianik eqqussivoq.

Illoqarfitik sinniisuuffigissavaat
Ataatsimiisitaliat illoqarfiit Nuup avataaniitttut kommunalbestyrelsimut sinniisuuffigissavaat, soorlu tusarniarneqartarfittut.

Aamma aningaasanik atorsinnaasaminnik tunineqarsimapput, taakkualu aaqqissuussinernut assigiinngitsunut atorneqartassapput.

Ittoqqortoormiini najukkami ataatsimiisitaliamut unnugu sisamanngornermi qinersisoqassaaq. Illoqarfimmi tassani innuttaasut arfinillit najukkami ataatsimiisitaliamut sassarlutik qinigassanngortipput.

Najukkami ataatsimiisitaliami ilaasortat sulilersinnagit kommunalbestyrelsimit akuerineqaqqaassapput.

Powered by Labrador CMS