16-17-inik ukiullit akiuussutissalertilivissut
Peqqinnissaqarfiup sulissutigaa inuusuttut 16-inik 17-inillu ukiulinnut akiuussutissalersuinissamut pilersaarusiorneq. Inuusuttunut akiuussutissamik kapuinissat Nuummi sapaatip akunnerata tulliani aallartissapput.
Inuusuttut 16-17-inik ukiullit coronamut akiuussutissalertinnissamut neqeroorfigitittussanngulerput.
Nuummi inuusuttut 16-17-inik ukiullit sapaatip akunnerata tulliani neqeroorfigitinnissartik naatsorsuutigisinnaavaat. Inuusuttut Pfizerimik akiuussutissalerneqassapput, akiuussutissaq taanna 18-it ataallugit ukiulinnut atorsinnaasutut akuerineqarsimammat. Moderna, nunatsinni akiuussutissatut maanna atorneqartoq, inuusuttunut 18-it ataallugit ukiulinnut atortussatut suli akuerineqanngilaq.
Nunatta nakorsaanera Henrik L. Hansen ataasinngornermi tusagassiortunik katersortitsinermi taama ilisimatitsivoq.
- Nuummi inuusuttuaqqat 16-17-inik ukiullit sapaatip akunnerata tulliani kapitinnissamut neqeroorfigineqassapput. Taakku pereerpata piaarnerpaamik kommunit illoqarfigisaanni anginerni inuusuttuaqqat kapitinnissamut neqeroorfigineqassapput, taakkunani neqerooruteqarnissaq ajornannginnerummat, nakorsaaneq Henrik L. Hansen ilisimatitsivoq.
Akiuussutissaq sianigisarialik
Akiuussutissaq Moderna nunatsinni maanna atorneqarpoq, passukkuminarnerummat. Nunatsinni sumiiffinni arlalinni peqqinnissaqarfimmi sulisut namminneerlutik modernamik akiuussutissalersuisinnaapput.
Pfizerimeersorli mianernarneruvoq, taassuminngalu akiuussutissalersuinissaq pilersaarusiorluarneqartariaqarluni. Akiuussutissaq minus 80 grademiitinneqartariaqarpoq, taamatullu akiuussutissalersuisut immikkut ilinniartinneqarsimasariaqarlutik.
- Nuup avataani akiuussutissalersuisussanngorutta Nuummeersunik akiuussutissalersuisartut angalasariaqassapput, nakorsaaneq oqarpoq.
Peqqissutsimut naalakkersuisoq, Kiista Fenckerip innuttaasut kaammattorpai corona.nun.gl-imik nakkutiginneqqullugit. Akiuussutissalersuinissamut pilersaarutit piareerpata nittartakkami saqqummiunneqarumaarput.
Nunatta naatsorsueqqissaartarfia naapertorlugu 1. januar 2021-mi nunatsinni inuusuttut 16-17-inik ukiullit 1.293-iupput. Taakkunannga 819-it kommunit illoqarfiini anginerni, Ilulissani, Aasianni, Sisimiuni Nuummi Qaqortumilu najugaqarput. Nuummi inuusuttut 16-17-inik ukiullit 381-iupput.