15-inik ukiulik Ena: Nalaatsornikkut assilitittartunngortoq
15-inik ukiulik Ena Rosing Nicolajsenip ukiut sisamat matuma siornatigut Katuamukarnermi kiinani nunarsuarmi saqqummersitsinneqarnissaa eqqarsaatigisimagunanngilaa
”The Weather Diaries” 2014-mi siullermik saqqummersinneqarpoq nunarsuarmilu katersugaasivinni ilisimaneqarluarnutuni saqqummersinneqartarluni arlalinniillu nersualaarneqartarluni. Saqqummersitsineq sisamanngormat ualikkut Nuummi Eqqumiitsulianik Saqqummersitsivimmi ammaanersiorneqarpoq.
Saqqummersitsineq ammaanersiorneqarnera soqutigineqarluarpoq, inuullu ataatsip saqqummersitani 30-usuni sisamani peqataaffigingamiuk tulluusimaarutigilluarsinnaavaa. 15-inik ukiulik Ena Rosing Nicolajsen qanoq ililluni nunarsuarmi tusaamaneqarluartumi saqqummersitami peqataalersimanini Sermitsiaq.AG-p atuartartuinut isertuutinngivippaa.
Nalaatsornikkut pisoq
- Katuap eqqaaniitillunga assiliisartut ilaannit assilitippunga. Allamilu peqataarusunnersunga pillugu kingorna ujartorneqarlunga, Ena Rosing Nicolajsen, Eqqumiitsulianik Saqqummersitsiviup saqqummersitaasa aappaani, 50 koruunilerlugu pisiarineqarsinnaasumi ilaasoq, oqaluttuarpoq.
Eqqumiitsuliortulli Ena peqataanerminik nuannarutiginneqisoq pisssarsiarisimavaat.
Nunarsuarmiit assilissat
- Ajunngilaq nuanneqalunilu. Ukiuni kingullerni sisamani nunarsuarmeersunik assinik, atuakkanik aviisinillu arlalinnik pisarsimavunga, taanna oqaluttuarpoq.
Eqqumiitsuliornerup iluani tusaamasaalersimanini inuusuttuaqqap eqqissisimasumik tiguaa.
Anguniagaq nutaaq
Maanna inuunermini aallartilikkani nutaaq qilanaarutigaa:
- Ataasinngorpat GUX-imi pinngortitamik ilisimatusarnermik sammisumik aallartissaanga. Tamanna qilanaarutigeqaara, taanna qungujulaqaluni oqarpoq.