14-inik ukiulimmut Qooqumut kuulti aamma sisorarfimmi rekorti

Naak nukappiaqqani nukarlerni unammisuugaluarluni, Qooqu Chemnitz Berthelsen unammissutsini tamani sukkanerpaavoq.

Nuummiup sisorartartup sisuneri marluk kukkuneqanngilluinnangajattut, unammillertimit qaninnermit sekundinik qulingiluanik sukkaneruvoq aammalu juniorini sukkanerpaasumit sekundinik marlunnik sukkanerulluni.

Ilaqutariit sisorartartut
Tamanna angusaq pikkorinaarnartuusoq oqaatigineqarsinnaavoq.

Taassumalu 14-inik ukiullip sisorartartup tamanna ilisarisimanngisaminik ilikkagarinngilaa.

Aleqai Niviaq aamma Nuunu Chemnitz Berthelsen, sisorarnermik unammeriaatsini arlalinni piukkunnaateqartuupput.

Najaata Inuunap uani AWG-mi sisorarfiit 'siuttutut' misileraasuuvoq, taamatullu anaanaa, Kisser Chemnitz, Nunatsinni pissartanngorniunnernut peqataasarsimavoq, ataataalu Jens Kristian Berthelsen, sisorarnerup tungaatigut aamma Tae Kwon-Domi ilisarisimaneqarluartuuvoq.

GM-imi aamma DM-imi pissartaasarsimasoq
- Sisunermi siullermi ajugaasup tullia taama sukkatigimmat tupaallaatigaara (Nolan Quigley Alaskameersoq, sekundinik pingasunik kingulliulluni apuuttoq, red.), Qooqu Chemnitz Berthelsen Sermitsiaq.AG-mut oqarpoq.

Sangusaartartoq sungiusaasuminit ilimagineqarluareertoq GM-imut aamma DM-imut arlaleriarluni peqataasareerpoq.

Kingullermilli peqataasimanngilaq, kisianni 2014-imi GM-imut aamma 2015-imi DM-imut peqataanermini Qooqu Chemnitz Berthelsen kuultinnappoq.

Pingasunngornermi sangusaapiloornermi unammisoqassaaq, sisamanngornermilu parallel-slalomimi unammisoqassalluni. Parallel-slalom inuusuttumut sisorartartumut pingaarnersaassasoq, taanna oqarpoq.

Aput nutaaq ajoqutaasoq
- Sangusaapiloorfik naatsuararsuullunilu amippoq, sisoraatikkalu takisuujupput, taamaattumik ajunngitsumik ingerlanissaq qularnaatsuunngilaq.

- Kisianni parallel-slalomimut qilanaaqaanga, taassuma saniatigut sukkaniuutissaagut, Qooqu oqarpoq.

Sisoraatinik sangusaartartut aamma snowboardertartut marlunngornermi apummut nutaamut oqimaatsumut eqqugaapput, tamatuma orlunarsitimmagu.

Orlunngitsoortoq
Kalaallit Nunaanni ilimagineqartut ilaat Hendrik Mølgaard Qeqertarsuarmeersoq sisunermi aallartinnerani uppippoq, taamaalillunilu aallartinnerliorluni.

- Apummit tigutinnginnama iluatsitsivunga, tassami tamannarpiaq sungiusarnikuugakku, Qooqu Chemnitz Berthelsen Sermitsiaq.AG-mut nassuiaavoq.

AWG-mit oqaluttuat kingulliit:

Jonas Strømsted kuultinnareerluni: 'Nuannaaqaanga'

AWG-medaaliat arfinillit najukkaminni snowboardertunit pissarsiarineqarput