139-it nunani allani ilinniakkamik siorna naammassinnipput
Nunani allani ilinniarnerup naammassinerata kingorna ilinniarsimasut tamarmik Nunatsinnut uterneq ajorput. Nunani allani ilinniarnerup naammassinerata kingorna 53-it siorna angerlarput.
Ilinniarlutik naammassisartut amerliartortillugit nunanut allanut ilinniariartortartut aamma amerlatsikkiartorput.
- Ilaatigut maani ilinniaqqiffiit amerlasuut peqannginnerat pissutaalluni ilinniaqqinniarlutik aallartartut amerlanerupput. 2003-mut sanilliullugu maanna ilinniaqqinniarlutik aallartartut 21,8 procentinik amerlanerupput, naatsorsueqqissaartarfik taama allappoq.
Tassami siorna nunani allani ilinniakkamik naammassinnittut 139-usut kisitsisit takutippaat. 30-t inuussutissarsiornikkut ilinniagaqalerput, 109-it qaffasinnerusumik ilinniakkamik naammassinnillutik.
- 2018-imi ilinniarnermik aallussisut akornanni 30,2 procentit nunani allani ilinniartuupput. Ilinniarlutik naammassisut ilaat Kalaallit Nunaannut angerlartarput, ilaat nunanut allanut nunasisartut, tamanna nalunaarutigineqarpoq.
2003-miit 2018-imut inuussutissarsiummik nunani allani ilinniagaqarsimasut ilinniarnerup naammassineranit ukioq ataaseq qaangiukkaangat 63,1 procentit nunani allani najugaqartarsimapput.
- Taakkunannga 21,4 pct.-it ilinniaqqittarsimapput. Nalinginnaanerpaavoq ilinniartut bacheloritut naammassinikut kandidatinngorniartarnerat. Ilinniakkap naammassineranit ukiut marluk siulliit ingerlaneranni ilinniaqqinnermik aallussisut amerlanerusartut. Ilinniaqqinnermik aallussisut ikiliartornera ilutigalugu Kalaallit Nunaannut utertartut amerliartorput, Naatsorsueqqissaartarfimmit tamanna oqaatigineqarpoq.