Skip to main content

13-inik ukiulimmik atoqateqarsimaneq qaammatini pingasuni parnaarussaassutaasoq

Nunatta Eqqartuussivia suliani arlalinni pineqaatissiisimavoq. Angut 13-inik ukiulimmik atoqateqarsimanini pissutigalugu qaammatini pingasuni parnaarussaavoq, suliamilu allami angut ukiuni marlunni qaammatinilu arfinilinni parnaarussaalluni

Nunatta Eqqartuussiviani angut 30-nik ukiulik qaammatini pingasuni parnaarussassanngorlugu pineqaatissinneqarsimavoq.

Nunatta Eqqartuussivianit angut taamanikkut niarsiaqqamik 13-inik ukiulimmik pingasoriarluni atoqateqarsimasutut, ataasiarlunilu niviarsiaqqamik 14-inik ukiulimmik iviangiatigut attuualaarinnilluni kanngunartuliorsimasutut pisuutinneqarpoq.

Nunatta Eqqartuussiviata taamaalilluni najukkami eqqartuussiviup aalajangiiffigisaa isumaqatigalugu pineqaatissiivoq. 30-nik ukiullip pinngitsuutinneqarnissani anguniarlugu pineqaatissiissut suliassanngorteqqissimavaa.

- Niviarsiaqqap angutillu ukiui taamatut nikingatigitillugit unnerluussisussaatitaasup pineqaatissiissut

sukannernerusariaqarnerarpaa, taamaammat piumasaqaatitaqanngitsumik parnaarussaasussatut pineqaatissinneqartarput. Nunatta Eqqartuussiviani unnerluussisussaatitaasoq tamatumannga isumaqatigineqarpoq, unnerluussisutut fuldmægtigi Emil Maegaard-Hofmann tusagassiorfinnut nalunaaruteqarnermini oqarpoq.

Suliaq suliareqqitassanngortitat arfinillit unnerluussisussaatitaasut Tasiilami angalanerminni suliarisimasaasa ilagaat.

Ukiukitsoq pineqarmat sukannernerusumik pineqaatissiisoqartoq

Suliat allat ilaanni pineqaatissiissut sukanganeruvoq.

Tassani angutip 31-nik ukiullip 'timimigut nukittunerunini ikiorsiullugu' niviarsiaraq 13-inik ukiulik sinittarfimminut ajattarlugu eqqussimavaa, taamaaleriarlunilu pinngitsaalillugu atoqatigisimallugu. Nunatta Eqqartuussivianit angut ukiuni marlunni qaammatinilu arfinilinni parnaarussassanngortinneqarpoq, parnaarussassanngortitsineq najukkami eqqartuussivimmit ukiumi ataatsimi qaammatinilu qulingiluani pineqaatissiisimasumit sivisunerungaatsiarpoq.

Nunatta Eqqartuussiviata sakkortunerusumik pineqaatissiinerminut immikkut pingaartissimavaa, niviarsiaqqap 13-iinnarnik ukioqarnera pinngitsaaliisullu utoqqaanerungaatsiarnera.

- Maluginiarpara, Nunatta Eqqartuussivianit meeqqanik ukiukitsunik pinngitsaaliilluni atoqateqartarneq pillugu unnerluussisussaatitaasup ilungersunartutut isiginninneranut isumaqatigineqartoq, taamaammallu pinngitsaalilluni atoqateqartarnermut nalinginnaasumik pineqaatissiissutaasartunit sakkortunerusumik pineqaatissiisoqarnissaanut isumaqataanera. Kalaallit Nunaanni pinngitsaaliilluni atoqateqartarnermut ukiumik ataatsimik qaammatinillu qulingiluanik pineqaatissiisoqartarpoq, taamaammat pineqaatissiissutitigut takutinneqarpoq, meeqqanik pinngitsaaliisarneq pinerlunnerit ajornerpaat ilaattut isigineqartoq matumani erseqqissumik takutinneqarpoq, Emil Maegaard-Hofmann oqarpoq.

Pineqaatissinneqartoq niviarsiaqqamut 80.000 koruuninik taarsiissutitut akiliisinneqassaaq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER