11-nik ukiulimmik toqutsisutut pasisaq: Tigummigallarneqartoq eqqarsartaatsimigut misissorneqassaaq
Angut 27-nik ukiulik, niviarsiaqqamik aqqanilinnik ukiulimmik Aasianni toqutsisimasutut pasineqarluni tigummigallarneqartoq, eqqarsartaatsimigut misissorneqassaaq.
Niviarsiaqqap aqqanilinnik ukiullip toqunera toqutsisoqarsimanertut politiinit suli paasiniaaffigineqarpoq. Kalaallit Nunaata Politiivisa Sermitsiaq.AG-mut tamanna ilisimatitsissutigaat.
Paasiniaanermut atatillugu angut 27-nik ukiulik, toqutsisimasutut pasineqartoq politiinillu tigummigallarneqartoq, eqqarsartaatsimigut misissorneqarnissaminut utaqqivoq.
Eqqarsartaatsimigut misissortinnissaq Danmarkimi ingerlanneqassaaq. Tamanna nalinginnaasumik qaammatialunni ingerlanneqartarpoq.
Angutip 27-nik ukiullip tigummigallarneqarnera januarip 27-ata tungaanut sivitsorneqarsimasoq, pasineqarneralu suli attanneqartoq, Kalaallit Nunaata Politiivisa ilisimatitsissutigaat.
Uppernarsaataasinnaasut arlallit misissorneqarput
Politiit ilanngullugu ilisimatitsissutigaat suliami uppernarsaataasinnaasut arlallit katersorneqarsimasut. Taakku Danmarkimut nassiunneqarsimalerput, maannakkorpiarlu Nationalt Kriminalteknisk Centerimi misissorneqarlutik.
- Suliami annertuumik peqqissaartumillu paasiniaasoqarpoq. Ilaatigut nakkutilliissutikkut immiussat tiguneqarsimapput, misissoqqissaarneqarsimallutillu. Takunnissimasinnaasut arlallit aamma killisiorneqarsimapput, ilisimatitsissutigineqarpoq.
Niviarsiaraq aqqanilinnik ukioqartoq tammaaneqartutut novemberip 26-ani nalunaarutigineqarpoq. Akunnialuit qaangiuttut, sisamanngornerup 27. november unnuaani niviarsiaqqap timaa tummerarsuit eqqaanni, KJ Greenland Aasiaat aamma aqquserngup Wille Brandtsvejip akornanni nassaarineqarpoq.
Paasiniaaneq annertooq
Paasiniaasut aqutsisuat Simon Andrés siornatigut oqaaseqarnermini erseqqissaasimavoq suliaq annertuumik paasiniaaffigineqartoq. Suliamilu uppernarsaataasinnaasut arlallit paasiniaqqissaarneqartut.
Kalaallit Nunaata Politiivisa suliami ilisimannittumik siornatigut ujaasisimapput. Nakkutilliissutini videomi takuneqarsinnaasimavoq angut KJ Greenland A/S saneqqukkaa, unnuk taanna niviarsiaqqap nassaarineqarnerani.
Suliami suli paasiniaasoqarnera pissutigalugu niviarsiaraq qanoq toqusimanersoq politiinit ilisimatitsissutigineqanngilaq.