100-nik ukioqarluni atoqateqaqqaartoq
Nuleeriniarniartilluni piffissamik atuilluartarpoq. Nunarsuarmi uumasut allat taama utaqqitigisanngillat. Eqalussuit 40-t paasisaqarfiginerujumallugit nuleerisarnerat qaammataasatigut ilaatigut malinnaavigineqartussanngorput.
Eqalussuaq tiinganiassatilluni naammagittallaqqissorsuuvoq. Tassa eqalussuaqatiminut ilassinissaminut tiinganiarnissaminullu utaqqerujussuaqqaartarpoq. Aviisi AG taama allaaserisaqarpoq
Ilisimatusartut paasivaat eqalussuit arnavissat minnerpaamik 100-leeqqaarlutik – 150-illuunnit tungaannut ukioqaleqqaarlutik – atoqateqaqqaartartut.
Taama pissuseqarneq inuit qasunarissajunnarsivaat kisianni eqalussuarmut piffissaq eqqortuuvoq. Taama ukioqalertinnatik nuleerinissamut piareersimasannginnamik. Eqalussuaq arnaviaq 1923-mi piaqqiarineqaruni 2023-mi aatsaat kinguaassiorsinnaalertarpoq.
Apeqqulli unaavoq: Ilisimatusartut qanoq paasisimavaat? Eqalussuarmi ilisimasaqarfigerpianngisap malinnaaviginissaa unammillernarpoq ingammik tikiffigiuminaatsuniittuunera pissutaalluni.
Taakkununnga ilisimatusarsimasuni siuttoq Julius Nielsen eqalussuaq pillugu ph.d.-liornikoq paasiniaaffigaarput. Taassuma ilisimatusarnermini Pinngortitaleriffimmi Nuummiittumi ilisimasaminik katersai ilaatigut tunngavigalugit.
- Kinguaassiorsinnaalerneranut ukiorigunagaannik ilimagineqartut arnavissat meterinik sisamanik takinerusumilluunniit takissuseqaleraangamik kinguaassiorsinnaanngortarmata. Eqalussuillu arnaviat taama takitigilertarput hunnorujut sinnerlugit ukioqaleraangamik, Julius Nielsen oqarpoq, nangipporlu:
- Ukiuinik missiliuineq isaanik uuttuut kulstof-14 atorlugu missingersuutaavoq.
Angutivissat qanoq amerlatigisunik ukioqaleraangamik kinguaassiorsinnaanngortarnerat suli misissuiffigineqarsimanngitsoq Julius Nielsen paasissutissiivoq.
Allaaserisaq tamaat AG-mi uani sapaatip-akunnerani saqqummertumi atuaruk. Uani isissutissarsigit:
