100 år: Anthon Nersornaammik sølvimik tunineqarpoq
Kunngeqarfiup iluani inuussutissarsiuteqarluni ingerlataqartuni utoqqaanersaasoq, Anthon Geisler Ilulissani Illumiuni pisiniarfeeqqamik ingerlataqartuusoq, nersornaammik ullumi tunineqarpoq.
Obs. Allaaserisaq nal. 14:30 allanngortinneqarpoq. Allaaserisami siullermik allakkaluarparput Anthon Geisler kuultimik Nersornaammik saqqarmiulerneqarsimasoq. Tamannali kukkuneruvoq ajuusaarnartoq, Anthon Geisler Inatsisartut Siulittaasuannit Vivian Motzfeldtimit sølviusumik Nersornaammik saqqarmiulerneqarmat.
Anthon Geisler Inatsisartut Siulittaasuannit Vivian Motzfeldtimit (S) inuuimmini akimasuumik tunineqarpoq. Inatsisartut Siulittaasuata, Vivian Motzfeldtip inuuissiortoq Nersornaammik sølviusumik ullumi tunivaa.
Saqqarmiuliineq ullumi sisamanngornermi kaffellernermi, Avannaata Kommuniata aaqqissugaani, ingerlaneqarpoq.
Anthon Geisler 100-nik ukioqalerpoq, taamaasillunilu Kalaallit Nunaanni, Kunngeqarfimmilu tamarmi, inuussutissarsiortutut ingerlataqartuni utoqqaanersaalluni. Ukiuni 60-nngulersuni namminersortutut inuussutissarsiuteqarpoq.
Piumassuseqarneq sulerusunnerlu
Inuussutissarsiuteqartoq 100-nik ukiulik inuunermini saqisutut, iffiortutut igasutullu atorfeqarsimavoq, maannalu ukiuni kingullerni arlariikkaani namminersortuulluni pisiniarfeeraateqarluni, sulinngiffeqajuitsuuvorlu.
Peqqissutsimut Isumaginninnermullu Naalakkersuisoq, Martha Abelsen (S) tusagassiutinut nalunaaruteqarluni inuuissiortumut pilluaqqusivoq.
- Ullumikkut iliuuseriniakkavit, tassalu ingerlaannarusussimanerit inuunermilu qiimaneq attatsiinnarsimaneranut, nalliuttorsiutigisinnaavat. Naalakkersuisut sinnerlugit inuiaqatigiinni maligassiuilluarsimaninnut qutsavigerusuppakkit taamatuttaaq nuannaarutigingaarparput illit ilaquttatillu inuuissiorninni pilluaqqusinnaallutit peqittuarnissannillu kissaallutit, Martha Abelsen (S) tusagassiutinut nalunaarummini allappoq.
Nersornaat akimasooq
Inatsisartut nittartagaanni ilisimatitsissutigineqarpoq saqqarmioq danskisut nunamiluunniit allamiutut innuttaassusilinnut Kalaallit Nunaat pillugu, tamatumanittaaq kalaallit oqaasii, piorsarsimassusiat, isigineqarnerallu pillugu sivisuumik annertuumillu nersortarialimmik suliniuteqarsimasunut tunniunneqarsinnaasoq.
Nersornaat sølviusoq, Anthon Geislerimut tunniunneqartoq, ukiumut tallimariarluni tunniunneqarsinnaavoq.