Siunnersuisarfiup RAL-imi pisortaasimasoq atorfinitsippaa
Verner Hammeken Nutaaq Seafoodimi siunnersortinngorsimalluni, Facebookimi ilisimatitsivoq. Suliffeqarfik aalisakkanik avammut niuernermut siunnersuisartuuvoq.
Verner Hammeken imaatigut assartuinermik misilittagaqarnerminik tapersiiniarluni Nutaaq Seafoodimut ilannguppoq, Mads Petersen oqaluttuarpoq. Mads Petersen kingullermik Danmarkimut saattuanik uumasunik 1600 kiilunik akitsorterussassanik assartuinermut ikiueqqammerpoq.
Jesper Hansen
Royal
Arctic Linemi pisortaasimasoq Verner Hammeken suliffeqarfimmi
pilersinneqaqqammertumi Nutaaq Seafood ApS-imi siunnersortinngorpoq.
Verner Hammeken Facebookimi taama
ilisimatitsivoq:
- Aalisartut salliutillugit
sullissineq. Kalaallit Nunaanut naleqarnerusoq aalisakkat
qaleruallillu pillugit. Aalisartunut inuiaqatigiinullu pitsaanerusoq,
Verner Hammeken allappoq, nangillunilu:
- Sullitanullu pitsaasoq silarsuarmi
sumiikkaluarpataluuniit. Uannut tamanna isumaqaqaaq. Nutaaq Seafood
(aallartisarneqartoq) tamakkununnga tunngavoq.
Assartuinermik
misilittakkanik tapersiissasoq
Nutaaq Seafood aallartisarneqartoq Mads
Petersenimit ingerlanneqarpoq. Verner Hammekenip ukiorpassuarni
umiarsuit assartuineranni misilittagaqarnermigut attaveqarluarninilu
suliffeqarfimmut tapersiissutigiumaarai, taanna Sermitsiamut
oqarpoq.
Nutaaq Seafoodimi aalisartut avammut
tunisaqarsinnaanissaannik ikiuisarpoq, Mads Petersenillu kingullermik
saattuat uumasut 1.600 kiilut Air Greenlandimit Danmarkimut
akitsorterunneqarniassammata assartorneqartut avammut
tunineqarnissaannut ikiuuppoq.
- Umiarsuaatileqatigiiffiit
suliniuuteqarnermik misiliinerannik ikiorpavut, aamma arlalinnik
allanik piareersagaqarpugut, ilaatigut nipisat suaat isiginiarpavut.
Aalisakkat arlallit Kalaallit Nunaanni pisarineqartartut uumatillugit
tunineqarsinnaanissamut naleqqupput, Mads Petersen oqarpoq, taanna
Hammeken assigalugu assartuinermik suliaqartarsimavoq, ilaatigut
ukiuni aqqaneq-marlunni Mittarfeqarfinni aamma kingusinnerusukkut
Mærskimi sulisimagami.
Aalisakkat uumasut saniatigut Nutaaq
Seafood aamma nioqqutissanik qerisunik avammut tunisinermut
ikiuisimapput, tassanilu Verner Hammeken imaatigut arsartuinermik
misilittakkaminik suliaqarsinnaavoq.
Aalisartut
allamik periarfissamik ikiorniaraat
Mads Petersenip Nutaaq Seafoodillu
aalisartut namminneq avammut tunisaqarsinnaalernissaannut
ikiorniarpaat, taamaalillutillu tunisaat akisunerulernissaat
neriuutigaat:
- Suliniutit
pitsaanerulersikkaangatsigitt poortuutit pitsaanerusut
nassaarinerisigut aalisartut toqqaannartumik iluaqutigisarpaat.
- Pisisartunik nassaaraangatta
aalisartut sapinngisamik naleqarnerpaamik
pissarsiaqartinneqartarnissaat kissaatigisarparput, Mads Petersen
oqarpoq.
Nutaaq Seafoodip aamma
inuussutissalerinermik ilinniarfik Inuili saaffigisimavaa aalisartut
amerlanerusut pikkorissarnissaannik akuersissummik
tunineqartarnissaannik kissaateqarlutik, taamaalillutik aalisartut
inuussutissalerinermut oqartussanit avammut
tunisisinnaalersinnaallutik:
- Aalisartorpassuit taamaaliorusupput,
pingaaruteqarporlu aalisartup avammut tunisat pisarineqarnerminniit
qanoq suliarineqartarnersu ilisimassallugu, Mads Petersen oqarpoq.