KNAPK AKERLIUSSUTSIMIK TAKUTITSIVOQ
Aalisarneq imminut akilersinnaajunnaarpoq
Aalisarnermut inatsisissatut siunnersuut, KNI-p ikummatissap akianik qaffaanerata aalisartut aningaasaqarnerannut sunniuteqarnissaa kiisalu aalisakkat kiilumut akiata appasippallaarnera KNAPK aaqqissuussaanik sisamanngornermi 11. april akerliussutsimik takutitsisoqarpoq. - Aalisakkanut akigititat taama appasitsigisimanngitsuuppata akerliussutsimik takutitsinissaq pisariaqarsimassanngikkaluarpoq, KNAPK-mi siulittaasoq Nikkulaat Jerimiassen oqarpoq
KNAPK afholder demonstration torsdag i protest mod stigningen i brændstofpriserne og forslaget til fiskeriloven.
Leiff Josefsen
Ikummatissap literimut 60 oorimik
KNI akitsuimmat aalisartut aningaasaqarniarnerat ajorseriarpoq.
Siorna aamma taamatut pisoqarpoq, saarullinnut kiilumut akigititat 30
procentimik apparmata, tassa kiilumut 10,50 koruuninit 8,25
koruuninut.
PISARTAGAQARTUNUT
Allaaserisaq una Nutaarsiassaqartitsivimmi aviisit naqitat
ilaanni allaaserisaavoq.
Allaaserisat pisartagaqartunit siunissami taamaallaat
atuarneqarsinnaajumaassapput.
Atuarluarna.
-
KNAPK nuna tamakkerlugu 69-inik immikkoortortaqarfeqarpoq. Sumiiffiit
ilaanni aalisakkat tunineqaraangata akigissaartinneqartarput,
taamaammallu isaasalerlugu aalisarneq ingerlalluarpoq. Nunali ima
avinngarusimatigaaq, sumiiffiit ilaanni kiilumut akigitinneqartartut
appasilluinnarlutik, Nikkulaat Jeremiassen oqarpoq.
-Saarullinnut kiilumut akigititat sumiiffiit
ilaanni 5,50 koruuninut siorna appariarput. Aalisarneq imminut
akilersinnaajunnaarmat aalisartorpassuit sinerissamiittut
aalisarunnaarput. Ilaasortatta ilaat tassa taama ajortigisumik
atugassaqartinneqarput, aalisartut piniartullu kattuffianni KNAPK-mi
siulittaasoq Nikkulaat Jeremiassen oqarpoq.
-
Inuttat aningaasarsiaat, ikummatissaq, aserfallatsaaliorneq
allarpassuillu akilertarpaat, Nikkulaat Jeremiassen oqarpoq. Maanna
aamma taamaattoqarpoq, tassa ikummatissanut akigititaq liiterimut 60
oorimik KNI-p qaffammagu. Taamaattoqarnera akueriumanagu
aalisarnermut inatsisissatut siunnersuutip Inatsisartuni
siullermeerneqarnissaanut ullormi tassani sinerissami
akerliussutsimik takutitsinissamik KNAPK kajumissaarivoq.
AKERLIUSSUTSIMIK TAKUTITSISUT
Akerliussutsimik takutitsisut sisamanngornermi nal. 13.00 missaani Inatsisartut allattoqarfiannut apuupput, Inatsisartullu ataatsimiinnertik unitsikkallarlugu KNAPK-p siulittaasuata oqaatigiumaagassai tusarnaaqqaarpaat.
-Aalisakkanut akigititat taama
appasitsigisimanngitsuuppata akerliussutsimik takutitsinissaq
pisariaqarsimassanngikkaluarpoq, KNAPK-mi siulittaasoq Nikkulaat
Jerimiassen oqarpoq
-
Akerliussutsimut takutitsinermut pissutaanerpaasoq tassaavoq
aalisarnermut inatsisissatut siunnersuut, Nikkulaat Jeremiassen
oqarpoq, sinerissallu qanittuani aalisarnermik eqquisussamut
siunnersuummut KNAPK-mi ilaasortat akerliusut ilanngullugu
nassuiaatigaa.
Aalisartoq nunamut qaqissaaq
Aalisarnermut
inatsisissatut siunnersuut allannguuteqarani akuerineqarpat
ilaasortaminnut annertuumik kinguneqassasoq KNAPK-p siulittaasua
Nikkulaat Jeremiassen aamma kattuffimmi pisortaq Vittus Qujaukitsoq
nassuiaapput.
-
Aalisarnermut inatsisissatut siunnersuut tusarniaassutigineqarmat
ilaasortatta itigartippaat, aamma aalisakkanut akigititat taama
appasereertigisut ikummatissanut akigititap qaffannissaa
naleqqutinngilluinnarpoq, Nikkulaat Jeremissen oqarpoq.
Inuussutissarsiornerup
aaqqissuussaanerata najugaqarfiillu allanngortinneqarnerisigut,
aalisarnermut inatsisissatut siunnersuutip inuiaqatigiinnut
kingunerisinnaasai eqqarsaatigalugit, ilisimatusartut assigiinngitsut
Dansk Teknisk Universitetimeersut, Ilisimatusarfimmeersut, Københavns
Universitetimeersut Aalborg Universitetimeersullu isornartorsiorpaat.
-
Ilisimatusartut isumaqatigaavut. Sinerissap qanittuani aalisartunut
pisassiissutit ikilinerat aalisartullu aalisarnermik
inuussutissarsiuteqarunnaarnissaat ernummatigaarput, Nikkulaat
Jeremiassen oqarpoq.
-
Ajornerpaamik pisoqarpat kommunit ilaannut akileraarutitigut
isertitat affaannanngornissaannik kinguneqassaaq, Vittus Qujaukitsoq
Nikkulaat Jeremiassenimit tapersersorneqarluni oqarpoq.
-
Aalisartut ilaquttaminnik pilersuisut aalisakkerivinnilu sulisut sumi
sulissappat? Suliffitik annaassavaat. Aalisartut nunamut
suliartornissaat nunap akissaqartippaa? Nikkulaat Jeremiassen
aperivoq.
-
Akerliussutsimik takutitsinermi Inatsisartuni politikerinut
apeqqutigiumaakkatta ilaat tamakkuupput, Nikkulaat Jeremiassen
nassuiaavoq.