Ombudsmandenip ukiumoortumik nalunaarutaa
Naammagittaalliuutit aatsaat taamak amerlatigisut
Inatsisartut Ombudsmandiat
2023-mi ukiumoortumik nalunaarut saqqummiuppaa. Naammagittaalliuuteqartartut ukiut ingerlaneranni amerleriarsimanerat kisitsisini takuneqarsinnaavoq. Ombudsmandi naammagittaalliuutinik suliaqarluni ulapissimavoq.
Gedion Jeremiassen aggustip ulluisa aallaqqaataani siorna 2023-imi Inatsisartut Ombudsmandiatut ivertinneqarpoq.
Leiff Josefsen
Oqartussaniit eqqunngitsumik pineqarsoriguit qanoq iliuuseqarsinnaavit?
Ombudsmandimut naammagittaalliuuteqarsinnaavutit.
Ukiut kingulliit ingerlaneranni naammagittaalliuutit amerleriarsimammata, ombudsmandi nunatsinni ilisimaneqarlualersimavoq:
- Naliliinera imaappoq, ukiut ingerlanerini ombudsmandeqarnerup isumaa innuttaasunut annertuumik qaffariaateqarsimasoq. Tamanna takusinnaavara ukiut tamaasa innuttaasut ombudsmandeqarfimmut saaffiginnittarnerisa qaffakkiartuinnarnerisigut, Inatsisartunut Ombudsmandi Gideon Jeremiassen oqarpoq.
Inatsisartut Ombudsmandiannut naammagittaalliuutit 299-it siorna tunniunneqarput:
- Taamaalillutik ombudsmandeqarfimmi suliat ukiumut naammassineqartartut ukiuni kingullerni tallimani 127-niit 305-inut qaffariaateqarsimallutik, assigalugu 140.2%-imik. Piffissamilu tamatumani innuttaasunik ilitsersuisarneq 176-iniit 250-inut qaffariaateqarsimalluni, assigalugu 42-imik.
Sakæusi Benjaminilu
Inatsisartuni Ombudsmandip assigiinngitsunik suliaqarsimavoq, ilaatigut kommunit siusinaartumik utoqqalinersiassanut tunngatillugu akuersaarneqarsinnaanngitsunik sivisuallaartumik sullissisimanerat.
Kommunit aamma soraarsitsinermut tunngasunik suliaqarsimanerat, kiisalu kukkunerit iliuuseqarfigineqarsimanngitsut pillugit suliaqarsimalluni.
Maluginiarneqarportaaq kalaallisut oqaasillit naammagittaalliorniarlutik saaffiginnuttartut amerleriarsimasut.
- Maluginiarpara kalaallisuinnaq oqaasillit saaffiginnittartut naammagittaalliuuteqartartullu amerleriarsimanerat, pingaartumik 2023-mi. Tamanna imatut paasivara, ”Sakæusip aamma Benjaminip” pisinnaatitaaffimminnik qaammaasaqalernerulersimanerattut.
Inatsisartut Ombudsmandiat Gedion Jeremiassen ukiuni 21-ini illersuisutut eqqartuussuserisutullu atorfeqarsimavoq. Ombudsmandiusimasoq Vera Leth ukiut 26-it sinnerlugit atorfeqareerluni juulip ulluisa 31-anni siorna 2023-imi tunuarpoq.