POLITIKKI
Kommunitoqqat utertinneqassappata qanoq akeqassava?
Kommunitoqqat uterfigeqqissagaluarutsigit qanoq akeqassanersoq, Atassutip siulittaasuata, Aqqalu C. Jerimiassenip paaserusuppaa. Tamanna tunngavigalugu inatsissatut aalajangiiffigisassatut siunnersuutaa sisamanngornermi apriilip ulluisa 18-anni Inatsisartuni oqaluuserineqarpoq.
Leiff Josefsen
Kalaallit
Nunaat kommuninut 18-nut 2oo9-ip siorna agguluttugaavoq. Ullumikkulli nunarput
tallimanik kommuneqarpoq. Kommunitoqqat uterfigeqqissagaluarutsigit qanormita
akeqassava. Tamanna Atassutip siulittaasuata, Aqqalu C. Jerimiassenip
akissutissarserusuppaa.
Taassuma
siunnersuutini Inatsisartunut saqqummiuppaa, tassani Naalakkersuisut
misissueqqissaarnissaannut peqquneqarput qanoq allaffissornikkut
ingerlatsinikkullu akeqassanersoq kommunitoqqat uterfigeqqinneqassagaluarpata.
- Nunarput
isorartungaarmat kujasinnerpaamiit avannarpasinnerpaamut 1135 km-nik
ungasitsigaaq. Taamaammallu ilumut massakkutuut eqiterussaasumik kommunit
katitigaaneranni akilersinnaassuseq apeqquserpara. Sanilliussissagaannilu
Københavnimiit Sankt Petersborgimut ungasissusaata assigivaa. Piffissanngorpoq
eqqarsaatigissallugu kiap massakkutuut kommunerujussuit iluarisimaarinerai,
Aqqalu C. Jerimiassen oqarpoq.
Iluatsinngilaq
Illoqarfiit
ilaat piffissami qanittumi kommunerisaminniit avissaarusullutik
kommunitoqqamullu uterusullutik kissaateqarput.
Atassut
naapertorlugu kommunerujussuanngortitsinerit iluatsinngisaannarsimapput:
-
Eqiterussineq immitsinnut qaninnerulersitsinani avissaartuussutaaginnaleqqavoq,
allaallu sumiiffinni tamat oqartussaaqataanerannut innarliilluni. Innuttaasut
qinikkaminniit qanilaassuseq amigaatigivaat, soorlu siornatigut kommunitoqqani
taamaassimagaluartoq, Aqqalu C. Jerimiassen oqarpoq.
Naalakkersuisut
kommuninilu borgmesterit politikkikkut ataqatigiissaarisut peqatigalugit
februaarimi 2024-imi ataatsimiikkamik ajornartorsiut eqqartorpaat. Tassani
politikkikkut ataqatigiissaarisut aalajangerput aaqqissuussaanermut
ataatsimiititaliarsuaq pilersinneqassasoq. Ataatsimiititaliarsuup kommunit
aaqqissuussaanerannut aaqqiissutissanik ujartuisussaallutik.
Taamaaliussaagut
imaluunniit naamik
Nalunaarusiaq
qanoq imaqassanersoq Atassutip takorusuppaa, kingornalu kissaatigalugu kommunit
qanoq iliuuseqarfigissanersut oqaluusererusullugu.
-
Siunnersuutip tunngavimmigut siunertarivaa paasissallutigu ilumut kommunitoqqat
utertissallugit ullumikkut akilersinnaassanersoq,
paasissutissinneqarluarsimaleriaruttalu eqqartorluarsinnaalissavarput qanoq
kommunit agguataarneqarsinnaanersut, qanorlu aaqqissuussaassanersut.
Atassutip
naatsorsuutigaa nalunaarusiaq aappaagu ukiakkut ataatsimiinnermi
saqqummiunneqarsinnaajumaassasoq.