QEQQATA KOMMUNIANI BORGMESTERI KOMMUNALBESTYRELSIMUT
Ataqqinninnermik takutitsigitsi!
Qeqqata Kommuniani borgmesterip kommunalbestyrelsip suleriaasaa suliarineqareersoq ataatsimiinnermi saqqummiuppaa. Kommunalbestyrelsimi ilaasortat pissuserissaarnissartik eqqaamassagaat oqariartuutaavoq.
Leiff Josefsen
Qeqqata Kommuniani kommunalbestyrelsi ataatsimiikkaangat ataqqinninneq suleqatigiissinnaassuserlu qulakkeerniarlugit borgmesterip kommunalbestyrelsimi ilaasortat eqqaasippai.
- Ilaasortanut tamanut kissaatigissavara suleriutsip tamattaalluta akuersissutigisimasatta malinneqarnissaa ilaasortanit tamanit eqqaamaneqarlunilu ataqqineqassasoq, borgmesteri Malik Berthelsen kommunalbestyrelsip ataatsimiinnerani oqarpoq.
Suliariaaseq politikkikkut sulilluarnissamut qulakkeerinnissaaq
Kommunalbestyrelsip ataatsimiinnerini kingullermi maluginiarneqarsimavoq suleriaasermut aalajangersakkat apriilip ulluisa 28-anni 2022-imi akuerineqarsimasut ilaasortaniit malinneqanngitsut, taamaattumik ilaasortat kajumissaarneqarput suleriaaseq eqqaamassagaat, ilanngullugulu eqqaasitsissutigineqarluni borgmesteri kisimi ilaasortat ataatsimiinnermi oqaaseqarsinnaanerannut qalliisinnaallunilu unitsitsisinnaasoq.
Allaffeqarfik paasissutissiivoq borgmesteri kisimi ilaasortat oqaaseqarsinnaanerinut kiisalu oqaaseqarnerinut unitsissinnaanerinut pisinnaatitaasoq:
- Erseqqissaaffigineqarnerput iluarisimaarparput. Piffissat kingulliit ilaatigut oqaluttoqartillugu oqaaseqartoq qalliinnarlugu oqaluttoqartarneranut borgmesteri kaammattorusupparput tassunga piaartumik unitsitsisassasoq, kommunalbestyrelsimut ilaasortaq Inuit Ataqatigiinneersoq Juliane Enoksen ataatsimiinnermi oqarpoq.
Innuttaasoq iluarisimaarinninngitsoq
Qeqqata Kommuniani kommunalbestyrelseip ataatsimiinnerani innuttaasoq naammagittaalliortoq misigineqaqqammerpoq. Borgmesterillu eqqaasitsissutigaa isiginnaartoq ileqqorissaanngippat, innuttaasut ataatsimiinnermi malinnaasut tamarmik inimiit aninissaat piumasarisinnaallugu.
Kommunalbestyrelsimi ilaasortat eqqaasitsissummut qujapput, taamaalillutik ataqqinnittumik sulinissaq eqqaamassallugu.