Upernavik aamma Uummannaq Sarfaq Ittuup angalanissamut pilersaarutaaniilerput

Oqaluttuarisaanermi nunap politikkikkut aqutsisuisa ilaasunik angallassineq silaannakkut taamaallaat pisussanngorlugu aaqqissuussiniarnikuupput, tassanilu siunertaavoq angalasut tamarmik helikopterinik timmisartunillu angallanneqartalissasut. 

Taamaakkaluartoq Kalaallit Nunaata inui sineriammiuupput kalaaliillu imaatigut angalaneq nuannaraat, taamaattumik pilersaarutit ataasiinnarmik aallaavilimmik ilaasunik angallassisalernissamik pilersaarut qatangiinnartinneqarpoq, umiarsuaatileqatigiiffiullu sinnikui, umiarsuaatit pingasut 2006-imi tunineqareeraluartut piaartumik annaassiniartoqarpoq, AUL-illu sinneri annaanneqarput umiarsuarlu Sarfaq Ittuk imaatigut angallassinerminik ingerlaqqippoq. 

Taamatuttaaq misilittagaqarfigineqarpoq Upernavik Uummannarlu avannaani Nanortalillu kujataani angallannermi pilersaarutinut ilanngunneqarnissaat politikkikkut aalajangiinikkut. Kisianni aamma tamanna ingerlatseqatigiiffimmut akisoorujussuuvoq. 

Maanna siunissaq qaamanerulerpasippoq ingerlatsiveqatigiiffimmut politikkikkut annertuumik piumaffigineqartartumut, umiarsuaatileqatigiiffiummi isumaqatigiissuteqarfigaa ilaasunik angallassisartoq namminersortoq, Sea Greenland, Sarfaq Ittuup ilaasussai Upernavimmeersut Uummannameersullu Ilulissanut sapaatip akunneranut ataasiarlutik Ilulissanut angalasinnaalersillugit tassanngaaniillu Sarfaq Ittummik ingerlaqqissinnaalersillugit.

"Nanunnguaq"-ut aamma "Heidi"-mut billetsit aul.gl-ikkut inniminnerneqarsinnaapput 

Taamaalillutik Arctic Umiaq Line A/S aamma Sea Greenland (siusinnerusukkut Naleraq Sea Safari ApS.) isumaqatigiissuteqarput aasaru ukiamullu Ilulissaniit Uummannaq aamma Upernavik angallavigisalernissaannut, sapaatit akunnikkaartumik. 

Angalanissamut inniminniiniaraanni nittartagaq www.aul.gl atorlugu inniminniisoqarsinnaavoq tassanittaaq angalanissamik pilersaarutit takuneqarsinnaapput.

Sea Greenland Diskobugt-imi aammalu sineriatsinni angallassisarput angallatit ”Nanunnguaq” aamma “Heidi” atorlugit.

Arctic Umiaq Line A/S ilaasartaat “Sarfaq Ittuk” Ilulissat Qaqortullu akornanni ilaasunik angallassisarpoq.

Ukiuunerani uninngareerluni sinerissami imaatigut ilaasunik angallassineq aallarteqqinneqassaaq marsip 21-iani.