Inuit Issittormiut Siunnersuisoqatigiiffiat (ICC) Kalaallit Nunaat 1. august 2012-imiit tamatumaluunniit kingorna siusinnerpaamik, Suliamik aqutsisutut atorfimmut nutaajusumut, inuttassarsiorpoq.

ICC tassaavoq nunat tamalaat akornanni nunap inoqqaavisa suleqatigiiffiat FN-imi siunnersuisutut inissisimasoq, Kalaallit Nunaanni, Canadami, Alaskami Chukotkamilu Ruslandimiittumi Inuit 170.000-iusut sinniisorisaat.

Suliamik aqutsisup akisussaaffigaa suliap “Promoting public consultation and participation in the industrial development in Greenland”, ICC-p Verdensnaturfondillu (WWF)-ip suleqatigiissutigisaata aqunnissaa nalunaarusiornissaalu. Suliamik aqutsisup ICC-p iluani avataanilu soqutigisallit attaveqarfigissavai, siuariaatit ilisimasat misilittakkallu aveqatigiissutigissallugit. Tamatuma saniatigut atorfininniartoq inuit nunallu inoqqaavisa pisinnaatitaaffii pillugit tusarniaanerni peqataassaaq, kiisalu suleqatigiit peqatigalugit suliassat allat piareersimaffigissallugit.

Atorfik aallaqqaammut ukiunut marlunnut (atasuinnarmik) immikkut isumaqatigiissusiornikkut atuutissaaq, atorfillu isumaqatigiissummi atugassarititaasut malillugit neqeroorutigineqassaaq, isumaqatigiissutip Kalaallillu Nunaanni Namminersorlutik Oqartussat maligassaat piumasaqaataallu malittussaavai.

ICC-mi suliamik aqutsisutut atorfininniartoq qaffasissumik ilinniagaqarsimassaaq, minnerpaamillu ukiualunni Kalaallit Nunaat Issittorlu pillugit uppernarsarneqarsinnaasumik ilisimasaqassalluni, soorlu nunap inoqqaavisa pisinnaatitaaffii, pisuussutit uumassusillit uumaatsullu, ilisimasatoqqat, silap pissusaata allanngoriartornera, inerisaaneq aqutsinerlu. Aammattaaq qinnuteqartoq kalaallisut, qallunaatut tuluttullu oqalunnikkut allattarissatigullu piginnaaneqarluassaaq.

Akissarsiat atorfimmilu piumasaqaatit immikkut isumaqatigiissutigineqassapput.

Qinnuteqaat, CV kiisalu soraarummeernermi uppernarsaatit, oqaaseqaatit paasissutissallu attuumassuteqartut allat allaffimmi pisortamut Rena Skifte-mut nassiunneqassapput e-mail: rena@inuit.org.

Qinnuteqarfissaq kingulleq: 20. juli 2012

Atorfik pillugu paasissutissat allat ilisimatusarneq pillugu siunnersortaanermit Bjarne Lyberth-imit pineqarsinnaapput telefon 32 36 32 imaluunniit e-mail: ababsi@inuit.org atorlugit. Saqqummiussaq suleqatigiiffillu pillugit paasissutissat allat nittartakkami pineqarsinnaapput uani: www.inuit.org.

Skriv venligst i din ansøgning, at du så jobannoncen hos Sermitsiaq.AG JOB.