”Angutivik” Nuummi takuteqqinneqalersoq

Isiginnaagassiaq nersualaarneqarsimaqisoq ’Den Grønlandske Mand' isiginnaartitsisartumit Klaus Geislerimut 2019-imi Reumertprisimik pissarsisitsisimasoq Nuummi isiginnaartartunit takuneqaqqissinnaanngorpoq. Isiginnaagassiaq Danmarkimi takutinneqartinnagu Nuummi ulluni marlunni danskisut takutinneqassaaq.

Isiginnaagassiaq Angutivik, danskisut taaguuserneqarsimasoq Den Grønlnadske Mand takusimanngikkukku maanna takunissaanut periarfissaqalerputit.

Isiginnaagassiaq Danmarkimi sumiiffinni assigiinngitsuni 14-ini takutinneqassaaq, tassungalu atatillugu Nuummi apriilip 30-ani maajillu aallaqqaataani danskisut takutinneqassalluni.

Isiginnaagassiamik suliaqarsimasut

Oqaasertalersuisoq: Niviaq Korneliussen, Ilitsersuisoq pilersaarusiortorlu: Hanne Trap Friis, Dramaturg pilersaarusiortorlu: Susanne Andreasen, Isiginnaartitsisut, oqaasertaleeqataasut oqaasertassanillu suliaqaqataasut: Hans-Henrik Poulsen, Ujarneq Fleischer, Klaus Geisler & Kristian Mølgaard.

Siunnersorti oqaasertassanillu suliaqaqataasoq: Kuupik Kleist, Isiginnaagassiamik atisassanillu aaqqissuisoq: Camilla Nielsen, Qaammaqqusersuisut: Gerth Lyberth & Morten Ladefoged, Nipilersuisoq: Gerth Lyberth, Teknikikkut aaqqissuisoq: Hans-Ole Amossen, Isiginnaagassiortut: Nunatta Isiginnaartitsisarfia & Teater freezeProductions, Plakatilersuisoq: Gerth Lyberth, Isiginnaagassiaq ukunannga tapiiffigineqarsimavoq: Air Greenland, Statens Kunstfond, Sermeq Fonden, NAPA – Nordens Institut i Grønland, Aarhus Kommunes Kunstråd.

Isiginnaagassiami angutip isumaa, atoqateqartarnera, siuaasai, sorsuuteqartarnera aamma pinngortitamut, illoqarfissuarmut arnamullu asanninnera takutinneqassapput.

Isiginnaagassiamik suliaqarsimasut nersornaaserneqarsimasut

Atuakkiortutut nersornaaserneqarsimasoq Nivia Korneliussen isiginnaagassiamik allaaserinnissimavoq, isiginnaagassiamillu Hanne Trap Friis ilitsersuisuusimalluni.

Isiginnaartitsisunit sisamaasunit ataaseq, tassalu isiginnaartitsisartoq Klaus Geisler isiginnaartitsinermi takutitsilluarnerpaatut Reumertprisimik nersornaaserneqarsimavoq.

Nersornaasiinermut ilaatigut tunngavilersuutigineqarsimalluni:

- Klaus Geislerip isiginnaartitsisinnaanerata annertussusia tupinnaannarpoq. Kalaaleq piniartoq imminut tatigilluinnarlunilu nukittoq – ussersullaqqeqalunilu erseqqilluinnartunik nikeriartarpoq. Angut qajannarsisimasoq aalakoorluni erseqqissumik paasilersimavaa inuunini ajorluinnartumik naggasertussanngorlugu. Oqaatsitigut paatsooqatigiinneq pissutigalugu kukkusumik kinguaassiorsinnaajunnaartinneqarsimavoq. Inuunermi atukkat killitsinnarlutillu annernartut.

Sumiiffinni assigiinngitsuni takutinneqartarsimasoq

Isiginnaagassiaq Nuummi 2017-imi septembarip qaammataani takuteqqaarneqarpoq, tamatumalu kingornatigut Kalaallit Nunaanni illoqarfinni assigiinngitsuni arfinilinni kiisalu KNR TV-kkut kalaallisut takutinneqarsimalluni.

Isiginnaagassiaq 2018-imi Århusimi, Odensemi, Aalborgimi Københavnimilu kiisalu CPH STAGE festivalimi kalaallisut takutinneqarpoq, tuluttut allagartalersugaalluni.

2018-imi isiginnaartitseqattaarluni angalaneq Savalimmiuni Tórshavnimi naggaserlugu takutinneqarsimavoq.

Isiginnaagassiaq Nunatta Isiginnaartitsisarfiani Industrivej 27-miittumi, apriilip 30-ani maajillu aallaqqaataani takutinneqassaaq.

Isiginnaagassiaq Danmarkimi illoqarfinni ukunani takutinneqassaaq: København, Holbæk, Helsingør, Store Heddinge, Vordingborg, Rønde, Mors, Fredericia, Arden, Haderslev, Holstebro aamma Herning.

Powered by Labrador CMS