Pissartanngorniunnerup takutitsiviulluartup kingorna angutit nunanut allanut unammisartut toqqarneqartut

Angutit assammik arsarlutik nunarsuarmi pissartanngorniunnissamut anngunniunnissamut peqataasussat toqqarneqarput.

Taama assammik arsartartut kattuffiat TAAK Facebookimi quppernermini allappoq.

Maajip arfernani anngunniunnermi siullermi Kalaallit Nunaat Canadamut unammissaaq. Mexico Citymi maajip arfernanit aqqaneq-aappaata tungaanut unammisoqassaaq.

Angutit nunanut allanut unammisartut ukuupput:

1. Suersaq Bohm Nathanielsen - N-48

2. Isak Olsen - GSS

3. Pele Lynge - GSS

4. Archibald Lennert - SAK

5. Sebastian Jensen - Ikast FS

6. Lars Ole Lyberth - GSS

7. Angutimmarik Kreutzmann - NûK

8. Inuujuk O. Søholm - GSS

9. Miki A. Heilmann - GSS

10. Akutaaneq Kreutzmann - N-48

11. Minik Dahl-Høegh - AMO HK

12. Kâle Fleischer - GSS

13. Malik Kleist Andersen - NûK

14. Malik Frederiksen - GSS

15. Knud Skifte - N-48

16. Kuutak K. Olsen - GSS

17. Noah John Davidsen - NûK

- Unammersuarneq sakkortussaaq, siullermik tallimariarluni unammisoqassalluni, immaqa aamma inissinnissamut unammisoqassaaq. Ulloq ataasiinnaq qasuersaarfissaqassaaq - taamaattumik unammisartut amerlassusaat minnerunngitsumillu sungiusarsimanerat unammiuaarnermi taamaattumi aalajangiisuussaaq - aamma immap qaavanit 2200 meterinik qutsitsigisumi unammisoqassammat. Unammiuaarnermi ajugaasuunissatta ilimagineqarneratut isiginngilara, eqqorluartumilli eqqarsartaaseqarutta, qinngornerput ersersikkutsigu iluatsitsilaaruttalu tupaallatsitsisinnaavugut, nunanut allanut unammisartunut sungiusaasoq Johannes Groth oqarpoq.

VM-imut anngunniunnermi Kalaallit Nunaata saniatigut Canada, Cuba, Mexico, Puerto Rico aamma USA peqataassapput. Tamanut unamminerit ingerlanneqassapput, tamatumalu kingorna holdit pointineqarnerpaat marluk finalimi unammissapput. Finalimi ajugaasoq VM-imut anngukkumaarpoq.