Pilutaq Berthelsen Ilulissaneersoq sikukkut arpannermi ajugaavoq
Arpattartut sineriammiit nunanillu allaneersut Ice Marathon Uummannaq 2024-mut peqataajartorlutik Uummannami katersuupput. Pilutaq Berthelsen maratonimi arpannermi ajugaavoq.
Uummannami sikukkut arpalluni unamminermi arpattartut 32-it peqataapput, tassani halvmaraton kiisalu maraton arpanneqarmata timersortartoq 33-inik ukiulik Pilutaq Berthelsen Ilulissaneersoq immikkut maluginiagassaavoq.
- Ajugaanissara naatsorsuutiginngikkaluarpara, unammisassakka pissangagigakkit. Kisianni arpannerput tamaat siuttuuginnaavissimavunga, Pilutaq Berthelsen Sermitsiamut oqaluttuarpoq.
Apuuffissaminut apuukkiartulerami uppernarsivaa ilumut ajugaalerluni.
- Apuukkiartuaalerlunga uppernarsivara. Qummoroortorput tikilluaqquseqalutik, tamarmik nuannaarlutik, arpattoq sukkasooq oqaluttuarpoq.
Imertitsivimmiittut nukissamik tunisisut
Maratonimik 42,2 kilometerisut isorartutigisukkut arpalluni timikkut tarnikkullu pisinnaassuseq pingaaruteqarpoq. Pilutaq Berthelsenip oqaluttuaraa tapersersortiminit nukissamik tunineqarlunilu qiimmassarneqarluarsimalluni.
- Imertitsivimmiittut nukissamik tunisisarput qiimmassaallutillu.
Pilutaq Berthelsenip oqaluttuaraa aatsaavissuaq sikukkut arpalluni maratonimut peqataalluni.
- Siku qummukajaaqarani narluinnartuuvoq, ajugaasoq oqaluttuarpoq. Ilanngullugulu oqaluttuaraa unamminissami tungaanut qimussit aqqutaatigut arpalluni sungiusarluarsimalluni.
Ice Marathon Uummannaq 2024-imut ajugaanermini akunnerit pingasut minutsillu 33-it arpappai.
Ice Marathon Uummannaq aappaagu marsip ulluisa 22-anni 2025 aamma pissasoq, Siku Crossimi siulersuisut nalunaarutigaat.
