Kalaallit Nunaata Kina gruppeqatigissavaa

Aggustip qaammataani U-18-it nunanut allanut unammisartut assammik arsarlutik nunarsuarmi pissartanngorniunnissamut Kinamut angalassapput.

Assammik arsartartut kattuffiat arfininngormat nalunaarpoq Kalaallit Nunaat Kina, Danmark aamma Taipei peqatigalugit unammersuarnermi gruppimut ilannguttoq, nunanullu allanut unammisartunut sungiusaasoq Victoria Budek Svendsen makitsineq sakkortuutut oqaatigaa:

- Makitsineq ilungersunarpoq, nunarsuarmili pikkorinnerpaat unamminissaat nivissanut pissanganarlunilu ilinniarfiulluassaaq.

Kina unammissagaat

- Unamminermi siullermi Danmark unammissavarput. Pissanganarluinnassaaq. Unamminermi siullermi holdit pitsaasut amerlapput, taamaattumik nunat angisuut allat soorlu Tyskland, Frankrig Ungarnilu unammissanngilagut, nunanut allanut unammisartunut sungiusaasoq tusagassiuutinut nalunaarummi oqarpoq.

Victoria Budek Svendsenip Kina nunaminni pissartanngorniutilersut unammilerunikkit avatangiisit misiginissai qilanaaraa:

- Unamminiarnerit ilungersunartussaapput, sungiusaqaagut sapinngisarpullu tamaat unamminissatsinnut piareersimalluta. VM pissangassutigeqaarput, peqataanissarput qilanaareqaarput, nunanut allanut unammisartunut sungiusaasoq oqarpoq.

Kattuffiup nunanut allanut unammisartut sungiusaasuat, sungiusaasup ikiortaa, timimik sungiusaasoq aamma aallartitanut aqutsisoq kattuffiup aallartitarissavai.

Unammisussanut pilersaarutit imaannissaat naatsorsuutigineqarpoq:

Pingasunngorneq 14. august

Danmark - Taipei aamma Kina – Kalaallit Nunaat

Sisamanngorneq 15. august

Kalaallit Nunaat - Danmark aamma Kina - Taipei

Arfininngorneq 17. august

Taipei – Kalaallit Nunaat aamma Danmark - Kina