NAAJA H. NATHANIELSEN
– Suliffeqarnikkut naligiinnginneq tamatsinnik eqquisoq
Inuiaqatigiit naligiinngitsut suliffeqarnerlu arnanut angutinullu agguataarsimasoq akiorneqassaaq, Naalakkersuisoq iliuuseqarfissanik arfinilinnik toqqaasimasoq oqarpoq
Inuiaqatigiinni sumiiffinni ikittuinnarni suliffeqarneq suiaassutsimut agguataarneqarsimanngilaq.
Taama oqarpoq Inuussutissarsiornermut naligiissitaanermullu Naalakkersuisoq Naaja H. Nathanielsen(IA), Naalakkersuisut peqatigalugit iliuuseqarfissanik arlalinnik suliffeqarnerup suiaassutsimut agguataarsimanerata akiornissaanut toqqaasimasoq. Taama Naalakkersuisut tusagassiuutinut allapput.
– Inuit inuussutissarsiornermut tunngasumik ilinniarsimasut atorfissaqartinneqartupilussuupput, ajoraluartumilli arnat ikittuinnaat tamanna toqqartarpaat. Peqqinnissaqarfiup isumaginninnerullu iluani sulisunik amigaateqartupilussuuvugut, ajoraluartumilli suliassaqarfinni taakkunani angutit ikittuinnaat takussaapput, Naaja H. Nathanielsen Sermitsiamut oqarpoq.
Suliffeqarnikkut arnat angutillu agguataarsimanerat pitsaasuunanilu uggornarpoq – aamma naalakkersuinikkut naapertuilluarnissaq kisimi pineqanngilaq, Naalakkersuisoq oqaluttuarpoq. Suliffinni tamatiguussuseq pitsaanersunik angusaqarfiusartoq uppernarsineqarsimavoq.
– Ilungersortinneqarnissarput pisariaqartipparput, inuit uagutsinnut assingunatillu allatut eqqarsartartut naapillugit. Taamaattumik angutit arnallu, ukiutigut assigiinngisitaartut inuillu allatut ittumik tunuliaqutaqartut pitsaasumik akuleriittariaqarput. Naalakkersuinikkut naapertuilluarnissaannaq pineqanngilaq – aningaasatigut aamma iluaqutaasarpoq, Naaja H. Nathanielsen oqarpoq.
Tamanut atukkat pitsaanerusut
Aalisakkanik suliffissuaqarneq Kalaallit Nunaata aningaasaqarnerani qitiuvoq, nunattalu avammut niuernerani 90 procent sinnerlugit isertitsissutaasarluni. Taamaattumik inuussutissarsiummi aningaasanik aallertoqarsinnaavoq, Naalakkersuisoq oqaluttuarpoq.
– Ajoraluartumilli aalisarnikkut sutigut tamatigut arnat sulisut ikippallaaaqaat, aalisartuniit pisortat allaffiinut.
Angutilli ingerlaqqittumik ilinniagaqarnikkut ikinnerupput, Nunatta Naatsorsueqqissaartarfianit kisitsisit takutippaat.
Naalakkersuisut iliuuseqarfissanik arfinilinnik toqqaasimapput: Akissarsiat assigiit, ilinniartitaaneq suliffeqarnerlu, naligiissitaaneq tamatiguussuserlu, erninermi sulinngiffeqarneq, suiaassuseq aallaavigalugu missingersuusiorneq paasissutissallu. Suliassaqarfiit tamarmik qulakkiissavaat innuttaasut suliffeqarnikkut periarfissaqarnissaat suiaassusaat apeqqutaatinnagu suliffeqarnikkullu suiaassutsimut agguataarsimaneq akiorneqarluni.
2024-mi Kalaallit Nunaanni naligiissitaaneq eqqartortillugu anguniagaq anguneqaqqajarsimanngilaq, Naaja H. Nathanielsen oqaluttuarpoq. Imminut toquttarnermi kisitsisini, angerlarsimaffeqanngitsuni inissiisarfinnilu angutit amerlanerupput, arnat atornerlunneqartarlutik, nakuuserfigineqarlutik aningaasatigullu naligiinnginnermik eqqugaallutik.
– Naligiissitaaneq pineqartillugu angutinut arnanullu atukkat pitsaanerusut pineqarput, tamattami naligiinnginnermik eqqugaasarpugut. Taamaattumik suliassaqarfinni tamani naalakkersuinikkullu sutigut tamatigut naligiissitaanermut sulinissamut peqqutissaqarluarpoq.
Nunatsinni Naatsorsueqqissaartarfiup kisitsisaataasa takutippaat 2022-mi angutit arnaniit 23 procentimik akissarsinerusimasut. Tamanna Naaja H. Nathanielsen naapertorlugu assersuutissaqqippoq Nunatsinni angutit arnallu naligiinnginnerannut.
– Angutit akunneri suliffii arnaniit pingaartinneqarnerusarput, tamannalu mamiagaara. Nuannaarutigeqaaralu Naalakkersuisut akissarsiat pillugit ilisimasaqarnerulernissamut aningaasanut inatsimmi aningaasaliisimammata.
Naatsorsuutigisat allanngortinneqartariaqarput
Arnalli angutillu akissarsiamikkut nikinganerat qanoq matuneqassagami? Aqqutissaq ataasiinnaanngilaq, Naalakkersuisoq oqaluttuarpoq. Siullertut paasissutissanik amerlanerusunik pissarsisoqartariaqarpoq sooq taamaannersoq, arnallu amerlanerusut inuussutissarsiornermi ilinniakkanik toqqaanissaminnut kajumissaarneqartariaqarput imaluunniit aalisarnerup iluani suliffeqarlutik. Angutit ”isumaginnittutut” atorfittaarnissaminnut kajumissaarneqartariaqarput.
– Suiaassutsikkut uuttuutivut naatsorsuutigisavullu sulissutigisariaqarpavut. Angutit peqqissaasuulluarsinnaapput, arnallu sarfalerisuulluarsinnaallutik. Kina oqarami suliaassutsitta piginnaasavut soqutigisavullu aalajangissagaat? Inuiaqatigiinni pilersitaapput, taamaattumillu allanngortinneqarsinnaallutik, Naaja H. Nathanielsen oqarpoq.
Taava aamma suliffigisatsinni pissusilersuutit silaannarlu oqaluuserisariaqarpavut.
– Ingammik angutit arnalluunniit amerlanerutillugit. Isumaliutigisariaqarpoq oqaatsinik atuinermi mattussiniartoqarnersoq imaluunniit suiaassutsimut ikinnerussuteqartumut innarliiniartoqarluni, Naaja H. Nathanielsen oqarpoq, kissaatigalugulu ilaqutariinnut meerartalinnut sulinermi atukkat pitsaanerunissaat.
– Arnat sivisunerusumik erninermut atatillugu sulinngiffeqartarput, tamannalu aningaasaqarnerannik eqquisarpoq. Taamaattumik ima sammiveqartariaqarpugut arnat angutillu akornanni sulinngiffeqarneq avinnerullugu, periutsinillu nassaartariaqarpugut erninermut atatillugu sulinngiffeqarnerup aningaasaqarnikkut nanertuutaannginnissaanut. Meerartaarneq inuiaqatigiit suliassaraat pingaartupilussuaq inuiaqatigiillu ingerlaqqinnissaannut aalajangiisuulluinnartoq, Naalakkersuisoq oqarpoq.
