AALLARNISAASUT
Suliffeqarfimminnik aallartitsiumallutik pisortatut atorfitik qimakkaat
– Erseqqissuliorsinnaasunik allaanerusumillu iliorsinnaasunik pisariaqartitsisoqarpoq, taamak namminersortutut siunnersuisarfimmik piginnittut oqarput
”Arnat klubbiat " aamma "kukkukuusivik".
Taakku oqaatigineqartartut uparuaatillu Arnakkuluk Kleistip Maliina Abelsenillu arnatut pisortatut sivisuumik atorfeqarsimasut siornatigut tusartarpaat, maannalu aamma nammineq siunnersuisarfiutiminnik Pikialamik piginnittutut aallartitsinerminni.
Suliffeqarfik ukiaq aallartinneqarpoq, isumassarsiarli ukiorpassuarni ineriartortissimallugu. Arnakkuluk Kleist Maliina Abelsenilu suliffitsik aqqutigalugu, Arctic Winter Games (AWG) 2016-imi ingerlanneqartussamut atatillugu, 2014-imi aaqqissuussisutut sulinerminni imminnut ilisarisimasariilerput.
- Nammineq suliffeqarfiutitsinnik aallartitsinissamik isumassarsiaq sivisuumik ineriartorpoq, assigiinngitsunimi suliffeqarfinnik kattuffinnillu siunnersueqatigiinnissamik pisariaqartitsisoqarpoq, siunnersuisutullu toqqarneqarnissamik qunujaassuseqartariaqarpoq, Maliina Abelsen oqarpoq.
Taanna Unichef Grønlandimi programchefitut atorfimminngaanneerpoq, Arnakkuluk Kleistilu Katuami pisortaasimavoq. Taakku namminersortunngornissamik aalajangerneq imaannaanngissimallunilu qunusuisaarnerusoq nassuerutigaat, suliffigissaareersimagaluarpummi.
- Soraarniuteqarluni aallaqqaataaniit aallartinneq imaannaanngitsorujussuuvoq, sorusunnerpulli sumilu nukinnik atuinissarput qularinngilarput. Soorunami alloriarneq annertuvoq, misiliinerullunilu, Arnakkuluk Kleist oqarpoq.
Akuutitsineq nukittoqqutaavoq
Arnakkuluk Kleistip Maliina Abelsenilu suliffigisimasaminni siunnersortit nunatsinneersut nunattalu avataaneersut assigiinngitsut suleqatigisareerpaat. Naak nunatsinni siunnersortit amerlagaluartut, allaanerusumik pingaarutilimmillu ilapittuisinnaallutik taakku marluk isumaqarput.
- Siunnersortit nunanit allaneersut inuiaqatigiit qanoq ingerlaaseqarnerannik qaammatialunni ilinniartinneqartariaqartartut suleqatigisarsimavagut. Inuiaqatigiinnut kalaallinut ilisimasanik annertuunik peqareerpugut, ataqatigiiffiillu takusinnaavagut, taamaalillutalu suliniutit allaffimmi toqqorsivimmut inissiinnartussanngornagit angusaqarsinnaavugut, Maliina Abelsen oqarpoq.
Inuiaqatigiinnut tunngasut inunnillu akuliutitsinerit siunnersortinut suliakkiinerni arajutsineqakkajuttarput, taakkuli isumassarsinermit iliuuseqarnermut ingerlanermi uuttorneqarsinnaasunillu angusaqarnermi pingaaruteqarluinnartuupput, taakku erseqqissaapput.
Taakku inunnut naalaarsinnaanertik taakkulu isumaannik akuutitsisinnaanertik nukittoqqutigaat.
- Angerlarsimaffeqanngitsunut periusissiussagutta, taava angerlarsimaffeqanngitsut akuutissavagut, kulturimillu inuuneq pineqarpat, taava kulturilerisut naalaassavagut, Arnakkuluk Kleist oqarpoq.
- Naak arlaat ”arnat siunnersortit uku marluk inunnik paasinnissinnaapput” oqarsinnaagaluarput, taamaakkaluartorli uagut angusanik amerlanernik tunniussisinnaavugut. Angusaqarusukkuimmi inuit pineqartut ilaatittariaqarpatit, Maliina Abelsen ilassusiivoq.
Naligiissitaanerup paqumigineqarnera
Suiaassuseq suiaassutsikkullu isummiuteriikkat Maliina Abelsenimut Arnakkuluk Kleistimullu pingaaruteqarput. Taakku naligiissitaanerup taassumalu pingaarutaa ammasumik oqaluuserissallugu qunuginngilaat.
- Naligiissitaanermik eqqartuerusuttunut ikittuinnarnut ilaavugut, taannalu eqqartuleraangatsigu assigiinngitsorpassuarnik qisuariarfigineqartarpugut, tamannalu naligiissitaanerup inuiaqatigiinni paqumigineqarnerannik ersersitsisuuvoq, Arnakkuluk Kleist oqarpoq.
- Naligiissitaaneq anguniagarigaanni, taava ”angutit uumigisimassavasi”-mik ersersitsisoqartarpoq, tamannalu eqqunngilluinnarpoq. Angutit arnanik ataqqinnittut arlaannillu naalakkiiniartuunngitsut suleqatigerusuttorujussuuvagut, misilittakkalli aallaavigalugit namminersorlutik inuussutissarsiortuni anguteqarpoq qangatut siuaassutsimut isummiussisimasunik, Maliina Abelsen, siusinnersukkut Naalakkersuisunut ilaasortaasimasoq oqarpoq.
Tassanilu siuaassutsini patsisigalugu isummerfigineqartarpoq.
- Qineqqusaalerninniillu angerlarlunga meeqqannik paarsiinnartariaqartunga oqarfigineqartarpunga, niviarsiaqqatullu taagorneqartarpunga, AWG sulissutigigatsigu kukkukuusivimmik taagorneqartarpugut, AWG2016-llu allatseqarfiani arnarpassuit sullimmata suliniutit ilumut naammassisinnaanerivut apeqqusersorneqartarpoq.
Tamannalu Arnakkuluup ilisarisinnaavaa.
- Arnaallutit kamaleruit piumasaqarlutillu taava piumasaqarpallaartutut qisuariarfigineqarsinnaavutit, angutaaguillu allatorluinnaq qisuariarfigineqassaatit Arnakkuluk Kleist oqarpoq.
”Qajannartuugit”
Pikialap suliaanut siullernut ilaavoq innuttaasuni misilittakkanik pissarsinissaq, assersuutigalugu kulturilerisunit suliffeqarnermillu, taakkulu Kommuneqarfik Sermersuup pingaarnertut periusissiaanut atorneqartussaapput. Qaammatit siulliit ingerlapallapput, suleqatigiillu suliassarsiortariaqannginnamik ”iluatsitsisimaarput”.
- Arnatut marluttut isigineqarnata siunnersuisarfiutilittut isigineqassaagut. Kikkut tamaasa sullissinnaavagut ”arnat siunnersuisartut”-tut isigineqannginnissarput kissaatigaarput. Tamanna arnat klubbiatut isiginnittutut navianarsinnaavoq, tamannali angutaannarnut tunngatillugu oqaatigineqarnavianngilaq, Maliina Abelsen oqarpoq.
Angutitut pissusilersorniarneq imaluunniit arnarpalussutsimik naqisimanninniarnissaq matumani pineqanngilaq – tamannalumi nukittoqqutaavoq.
- Qajannartuuneq ikioqquneqarnissamillu qinnuiginnissinnaaneq uagut isumarput malillugu iluaqutipilussuuvoq. Kikkut tamarmik assigiinnissaasa anguniannginnissaanik isumaqavippunga, tamattami piginnaanivut isiginnittaasivullu assigiinngitsut akulerukkutsigit suut tamarmik soqutiginartupilussuanngortussaapput, Maliina Abelsen oqarpoq.