Kommuni HIV-mik tuniluuttoqarneranut akiuinialerpoq
Qeqqata Kommunia suliniutinik arlalinnik, HIV-mik aarlerisaaruteqartoqarneranik unitsitsisussamik aallartitsivoq. Sisimiuni inuusuttut tallimat qanittukkut HIV-mik tunillatsipput.
Qeqqata Kommuniata HIV-mik ulorianartumik kommunimi tuniluuttumik, tallimanik tunillatsiffiusumi aamma allanik misissuiffiusumi unitsitsisussanik suliniutinut amerlanerusunut aningaasaliiniarluni aalajangiuppaa.
Kinguaassiutinik ilisimatusarsimasoq pikkorissartitsissaaq
Kinguaassiutinik ilisimatusarsimasoq Ulrikka Holm suliakkerneqarluni Sisimiunut pikkorissaajartortinneqassaaq, suliffissaaleqisunut aamma inuusuttunut 15-nit 18-inut ukiulinnut suliffissaaleqisunut sammisaqartitsissaaq. Pikkorissaanerit ilaatigut inuttut ineriartornermut atoqatigiinnermullu tunngasunut tunngassuteqassapput, ilaqutariinnut tunngasunut pisortap Kirsten Bødkerip tusagassiuutinut nalunaarummi nassiussaani tamanna atuarneqarsinnaavoq.
- Taakkua saniatigut Ilaqutariinnermut kiffartuussivimmi pinaveersaartitsisut tv-kkut ussassaarutinik kinguaassiutitigut nappaatinik pinaveersaartitsissutissanik sananissaminnik pilersaaruteqarput, innuttaasunillu ataatsimiisitsinerit napparsimavik kigutileriffillu suleqatigalugit ingerlanneqassallutik, tassani kajumerisartut tiitorfiit HIV-mik akiuiniarluni nalunaarutitallit pilersaarummut aamma ilaallutik, Kirsten Bødker ilisimatitsivoq.
HIV-mik ulorianartumik tuniluuttoqarnerata unitsinneqarnissaa annertuumik ukkatarineqarnissaa kommunip kissaatigaa.