Kalaallit Nunaanni suliffissarsiortut 2.000-it ataakkaat
Naatsorsueqqissaartarfimmit kisitsisit nutaat takutippaat inuit 1.868-it suliffissarsiortutut oktobarimi nalunaarsorsimasut.
Taamaasillutik suliffissarsiortutut nalunaarsorsimasut ikileriaqqipput, ukiup siuliani oktobarimi nalunaarsorsimasunit 379 ikileriarsimallutik. Suliffissarsiorlutik nalunaarsorsimasut siorna oktobarimi 2.247-pput.
Nunatsinni illoqarfinni katillugit 1.521-t suliffissarsiorlutik nalunaarsorsimapput, nunaqarfinnilu nalunaarsorsimasut 347-llutik.
Suliffissarsiorlutik nalunaarsukkat saqqummersinneqartarput kommuninut suliffissarsiorsimasut tunngavigalugit. Qaammammi inuk ataaseq suliffissarsiortutut naatsorsugaasarpoq, qaammatip ingerlanerani ataasiarluni arlaleriarluniluunniit nalunaarsorneqarsimanera apeqqutaatinnagu. Suliffissarsiortutut nalunaarsukkat qaammatikkaartumik saqqummersinneqartarput.
Nuummi oktobarimi suliffissarisortut amerlanerpaapput, 372-it nalunaarsorsimagamik. Ittoqqortoormiillu ikinnerpaanik suliffissarsiortoqarpoq, tassami inuit 16-it suliffissarsiortutut nalunaarsimagamik.